Bota e futbollit është tronditur thellë këtë mëngjes nga lajmi tragjik për vdekjen e Diogo Jotës, sulmuesit portugez të Liverpoolit, i cili ka humbur jetën në një aksident trafiku në provincën spanjolle të Zamora. Ngjarja ndodhi në orët e para të së enjtes, në kilometrin 65 të autostradës A-52, në zonën e Sanabrias.

Në aksident humbi jetën edhe vëllai i tij, André Jota, 26 vjeç, gjithashtu futbollist profesionist, i cili aktivizohej me skuadrën portugeze Penafiel. Sipas dëshmitarëve që njoftuan shërbimet emergjente, makina me të cilën udhëtonin doli nga rruga dhe më pas u përfshi nga flakët, duke shkaktuar edhe një zjarr të përhapur në vegjetacionin përreth.

Diogo Jota ishte vetëm 28 vjeç dhe konsiderohej një prej lojtarëve më të rëndësishëm të Liverpoolit. Ai iu bashkua klubit anglez në vitin 2020 nga Wolverhampton, në një transferim që kushtoi 44.7 milionë euro. Gjatë periudhës me “The Reds”, ai zhvilloi 182 ndeshje, duke shënuar 65 gola dhe dhënë 26 asistime.

Me fanellën e Liverpoolit, Jota fitoi tre trofe të rëndësishëm: një Premier League (2024–25), një FA Cup dhe një Carabao Cup, të dyja në sezonin 2021–22. Para se të transferohej në Angli, ai kishte qenë edhe pjesë e Atlético Madrid, si dhe një nga shpresat më të mëdha të Portugalisë në arenën ndërkombëtare.

Një humbje e pazëvendësueshme për futbollin dhe një ditë zie për sportin botëror.sn