Të dashurat që frymëzuan poetët në diktaturë- Poezi nga Fatbardh Amursi

July 5, 2025

Mos u dashuroni me poetët,

Qielli s`ngjall më kuriozitet,

S`ka horizonte,

Por dekore.

Poeti sot të bën serenatë poshtë ballkonit

Dhe nesër e gjen të hedhur si leckë

Në një minierë a në një llogore.

.

Ua prishin mendjen me poezira,

Ua trazojnë shpirtin me fjalë zarari,

Poetëve s`u rrihet pa e lëshuar gojën,

Dhe aty ku hesht nga frika i vrari.

.

I trëmbnin të dashurat e poetëve,

Qoftë kjo një Helenë apo Penelopë,

Ngaqë për poetët ato ishin muza,

Atribut që i njihej veçse partisë,

Por ato për një idil netëve të vona

Ia lejonin vetes të gjitha marrëzitë.

.

Jeta e poetit varej dhe nga një metaforë,

Romantikun për kollaj e quanin aventurier,

Ishin të dashurat,

Që i shpëtonin rebelët sa herë:

Kur në depresion

Mund të vrisnin veten hedhur nga ballkoni

Apo damarët duke prerë.

.

Të dashurat e poetëve në diktaturë

I njohin asketët që damkosnin me slogane,

Që poezitë erotike kushtuar atyre i mbyllnin në sirtarë,

Tani demodet me alibinë e luftës në mbrojtje të artit,

Duan të fshehin gjurmët e krimit

Për poetët që vranë…

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi