Kryetari i Partisë Demokratike, Sali Berisha teksa u ndal tek hetimet për Belinda Ballukun, tashmë e pezulluar nga detyra tha se në telefon e vartësit të saj, Evis Berberi janë mbi 2700 mesazh.

Sipas Sali Berishës, këto mesazhe janë të Belinda Ballukut dhe Edi Ramës.

“Vetëm në njërin telefon të Berberit ka 407 minuta video, pa llogaritur fotografitë”, tha Berisha, duke shtuar se “kleptokracia është në panik të tmerrshëm”.

Berisha: Lubia nuk ka bërë asgjë, vetëm ka zbatuar urdhrat. Mesazhet shumë më tepër të Lubisë tek Evis Berberi që dje filloi ta merrte në mbrojtje janë të Ramës.

Janë mbi 2700 mesazhe. Vetëm në njërin telefon të Berberit ka 407 minuta video, pa llogaritur fotografitë. Janë 4 telefona ata. Kleptokracia është në panik të tmerrshëm. Faktikisht pret shqiptarët të lajnë duart me të. Panorama

Kryetari i Partisë Demokratike, Sali Berisha ka kujtuar 8 Dhjetorin 1990, ku studentët nën udhëheqjen e Azem Hajdarit nisën protestat për të rrëzuar regjimin komunist.

Në fjalën e mbajtur me rastin e Ditës së Rinisë, Berisha vlerësoi  figurën e Azem Hajdarit, ndërsa theksoi se protestat dhe revolucioni demokratik ndau epokat dhe vendosi pluralizmin politik.

Berisha tha se studentët  e dhjetorit 1990 ‘ishin misionarë të paepur, të cilët që në protestën e parë shpallën si motot të revokacionit të tyre, liri demokraci, Shqipëria si Evropa’.

“Si sot 35 vite më parë më 8 dhjetor 1990 studentët e UT dhe shkollave të tjera të lartë të udhëhequr nga Azem Hajdarit nisën protestat, revolucionin demokratik që si një uragan iu vërtetë ndau epokat dhe vendosi pluralizmin politik. Sot mbarë kombi shqiptar nderon 8 dhjetorin si datën më të rëndësishëm në historinë e lirisë së tij pas shpalljes së pavarësisë.

8 dhjetori 1990 është ditëlindja e lirive. Në këtë datë engjëjt e demokracisë të udhëhequr nga prijësi i tyre legjendar Azem Hajdari u ngritën në Tiranën në lëvizjen studentore për të përmbysur diktaturën komuniste

Studentët ishin misionarë të paepur, të cilët që në protestën e parë shpallën si motot të revokacionit të tyre, liri demokraci, Shqipëria si Evropa”, tha Berisha. gsh

Gjatë vizitës së tij në Uashington, kryetari i Partisë Republikane, njëkohësisht deputeti Fatmir Mediu ka zhvilluar një sërë takimesh me kongresmenë amerikanë dhe përfaqësues të lartë, duke intensifikuar diskutimet mbi gjendjen politike dhe institucionale në Shqipëri.

Në qendër të bisedave kanë qenë problematikat e zgjedhjeve, krimit të organizuar, korrupsionit qeveritar dhe përdorimit politik të sistemit të drejtësisë, çështje për të cilat interesimi dhe shqetësimi i partnerëve amerikanë është rritur ndjeshëm pas seancave të fundit dëgjimore në Kongres.

Me përfaqësues të rëndësishëm të komiteteve kyçe të Kongresit, Mediu ka ndarë analizën dhe shqetësimet lidhur me rrezikun që paraqesin këto zhvillime për demokracinë dhe stabilitetin në Shqipëri.

Reagimi:

Uashington DC
Gjatë vizitës në SHBA vazhdova takimet me miq në Kongres.
Mëngjes miqësor pune, me kryetarin e Komisionit për Europën Kongresmenin KeithSelf i cili organizoj seancën dëgjimore për Ballkanin, mikun Eduard Jospeh një nga dëshmitarët kryesor të kësaj seance në kongres, ku u theksua nevoja e vlerësimit të problemeve të gjyqësorit në Shqipëri dhe problemeve të zgjedhjeve dhe krimit organizuar.
Kongresmenin Pete Sessions Kryetar i Komisioni i Mbikëqyrjes së Kongresit për Operacionet e Qeverisë, Kongresmenin Robert Aderholt Kryetar i Grupit për Shqipërinë në Kongres, Kongreswoman Virginia Foxx Kryetare e Komitetit të Rregullave në Kongres, Kongresmenin Jonathan Jackson, Kongresmenin Juan Vargas, si dhe me përfaqësues të Komitetit për Drejtësinë.
Në këto takime biseduam për situatën e rëndë politike në Shqipëri manipulimin e zgjedhjeve të denoncuar qartë nga raporti i ODHIR, krimi i organizuar lidhur me kartelet e drogës dhe ndikimi tyre i fuqishëm në politikë dhe qeveri, korrupsioni i qeverisë dhe veçanërisht përdorimi politik i gjyqësorit për të shkatërruar opozitën. bw

Bashkia Tropojë është një njësi administrative në verilindje të Shqipërisë, pjesë e qarkut të Kukësit. Ajo përfshin një territor prej 1,057.3 km² dhe ka një popullsi prej rreth 14,189 banorësh, sipas Institutit të Statistikave.

Në qendër të fshatit Tropojë u organizua një takim pune me kryetarët e fshatrave të njësive administrative Tropojë, Bytyç dhe Margegaj. Administratori i njësisë administrative Tropojë, Adem Beli, kishte bërë një përgatitje serioze për zhvillimin e këtij aktiviteti.

Inxhinieri i talentuar Kristaq Puleri bëri prezantimin e “Paketës së Alpeve”. Po kështu, kryetari i Bashkisë Tropojë, Rexhë Byberi, u ndal tek rezultatet e pritshme që do të ketë Tropoja nga këto projekte.

Inxhinieri Egzon Muhameti, nëpërmjet skicave, demonstroi projektin para të pranishmëve. Me shumë interes u ndoq edhe fjala e administratorit të njësisë administrative të Bytyçit, Isa Hoxha.

Fjalë përshëndetëse mbajtën edhe administratori i njësisë administrative të Tropojës, Adem Beli, si dhe përgjegjësi i njësisë administrative të Margegajve, Flor Metaliaj.

Unaza e Bjeshkëve prej Markoshit në Tropojë, duke përfshirë rrugën e Dragobisë dhe të Ceremit, do të jetë një rrugë me standarde të larta. “Rruga e Alpeve Turistike” mundëson zhvillimin e Tropojës, duke kaluar shumë afër staneve ekzistuese, ndërsa në Qafën e Dobërdolit, në 2200 metra mbi nivelin e detit, do të ndërtohet edhe një tunel 1 km e 20 metra i gjatë.

Ky projekt do të ketë mbi 1 mijë kilometra shtrirje gjeografike.

U theksua gjithashtu rëndësia e bashkëpunimit dhe e bashkëveprimit me shtetin kufitar Mali i Zi, duke u lidhur me rrugë automobilistike, e cila do të sjellë zhvillim turistik, ekonomik dhe kulturor.

Pjesëmarrësit u zotuan se do të japin kontributin e tyre në drejtim të “Unazës së Bjeshkëve” dhe “Paketës së Alpeve”.

Ivanka Trump, vajza e presidentit amerikan Donald Trump dhe bashkëshortja e Jared Kushner, një nga investitorët potencialë në projektet turistike në ishullin e Sazanit, duket se po studion seriozisht historinë e Shqipërisë. Ajo ka ndarë me ndjekësit e saj në Instagram disa materiale që po i përdor për të studiuar Shqipërinë dhe shqiptarët.

Në një postim në Instastory, Ivanka ka publikuar një foto me tre libra të vendosur mbi tavolinë, “Albania: From Anarchy to Balkan Identity” nga Miranda Vickers dhe James Pettifer, “The Albanians: A Modern History” nga Miranda Vickers si dhe “Gjenerali i ushtrisë së vdekur” nga Ismail Kadare.

Sakaq, Ivanka tregon se po bën kërkime, duke lënë të kuptohet se po përgatitet dhe po informohet rreth historisë, identitetit dhe letërsisë shqiptare.

Kryetari i Partisë Demokratike, Sali Berisha ka publikuar një reagim të gjatë, ku komenton zhvillimet e fundit lidhur me hetimet e SPAK ndaj Belinda Balluku, tashme e pezulluar me vendim të Gjykatës Antikorrupsion për aferat me tunelin e Llogarasë dhe Unazën e Madhe.

Berisha pretendon se Balluku është vënë në pozitën e një “të penduare publike” dhe se, sipas tij, ajo po ushtron presion ndaj strukturave politike dhe institucionale për të mbrojtur veten.

Lideri opozitar akuzon kryeministrin Edi Rama për përfshirje në çështje, duke thënë se Balluku “di më shumë se kushdo tjetër” për aferat e qeverisë dhe strukturat shtetërore.

“Lubia ka në dorë arkivën më të pasur të bisedave, mesazheve, videove intime dhe fotove të ministrave, deputetëve, zyrtarëve përfshirë këtu Ramën, Vlorë Hysenin, Ergys Agasin, prokurorëve, gjyqtarëve, por edhe ambasadorëve, gazetarëve, kundërshtarëve, si dhe lajkatareve etj”, shkruan Berisha.

Berisha thotë se Balluku ka kërkuar mbështetje të plotë politike brenda PS, ndërsa pretendon se mes saj dhe kryeministrit Rama ka pasur tensione të ashpra lidhur për hetimin ndaj saj.

Reagimi i Sali Berishës

Më mirë e penduara e Sovranit se sa e penduara e Dumanit!

Lubi Balluku, e penduara e parë publike në Shqipëri.

Miq, pas komunikimit në prokurori të akuzës për vjedhje të 50 milionë eurove vetëm me tunelin e Llogarasë, me Lubi Ballukun ka ndodhur diçka e paparë ndonjëherë në tërë historinë e shtetit shqiptar. Ajo, në një vendim që lë mbrapa edhe Ledi Makbeth, vendosi të bëhet e penduar. Por i tha vetes: “Më mirë e penduara e Sovranit se e penduara e Dumanit.” Pas këtij betimi, ajo shpalli publikisht moton “Do t’ju marrë me vete” dhe e shpërndau atë rrufeshëm skaj e anë të narkoshtetit. Moton ajo e mori nga balada “Cili viu, viu, viu, kush ia bën, ia bën vetiu.” Me këtë moto, njëlloj si balada, Lubia, tashmë e penduara e Sovranit, lemeriti deri në palcë kupolën e mafies shtetërore: vetë Ramën, ministrat, zyrtarë të lartë, gjyqtarë, prokurorë, kryepolicë etj., por edhe shërbëtorët e paguar të saj në media.

Të dashur miq, me shumë të drejtë ju pyesni: pse Lubia vendosi të bëhet Nuredin Dumani qeveritar publik? Pse ajo mori këtë rol? Përgjigjja është komplekse.

Së pari, ajo mori këtë rol sepse ajo dinte për Ramën dhe narko-nomenklaturën më shumë se kushdo tjetër, madje edhe se vetë Rama dhe Hyseni, apo dhe më shumë se ç’dinte Nuredini për Talon, Suelin, Taon e tij. Bistri dhe Agim Ismaili, me urdhër dhe për llogari të saj, kishin regjistruar dhe hakeruar për vite e vite cilindo që ajo i kishte urdhëruar. Lubia ka në dorë arkivën më të pasur të bisedave, mesazheve, videove intime dhe fotove të ministrave, deputetëve, zyrtarëve përfshirë këtu Ramën, Vlorë Hysenin, Ergys Agasin, prokurorëve, gjyqtarëve, por edhe ambasadorëve, gazetarëve, kundërshtarëve, si dhe lajkatareve etj.

Së dyti, tek Lubia u zgjua geni i keq. Ajo është mbesa e një serial killeri gjakftohtë, terroristit Beqir Balluku, të cilin e kishin në diktaturë të gjithë frikë, madje edhe vetë serial killeri më brutal i regjimit, Mehmet Shehu. Pra, terrorin e ka në gjen, ndaj dhe menjëherë pas vendimit të saj për t’u bërë e penduara e Sovranit, Lubia vendosi:

Së pari, ajo ditën që SPAK-u i komunikoi akuzën, i komunikoi Ramës vendimin e saj për ta marrë me vete atë në rast se nuk do ta mbronte dhe secilin që do guxonte të hapte gojën kundër saj.

Së dyti, zgjoi në mesnatë makinerinë e gossip-it dhe mbushi Tiranën në çdo skaj e cep të saj me çuçurimën se “në Ankara më mori Rama” dhe se “për tunelin e Llogarasë kam zbatuar vetëm urdhrat e tij, ndaj dhe do ta marr me vete për leckash palloshin e gjatë.”

Së treti, po atë mesnatë, urdhëroi dhe pariti njeriun më të afërt të Ramës në media, ideologun e narkoshtetit Baton Haxhiun, të botojë editorialin me titull Korrupsionin gjeopolitik e bën kryeministri dhe nuk mund ta bëjë ministri, duke pohuar kështu se 50 milionë euro në tunelin e Llogarasë nuk janë vjedhur nga Lubia, por nga Rama, sepse ajo ishte “vjedhje gjeopolitike”, kompetencë e kryeministrit, dhe se ajo, me urdhër të tij, tenderin e tunelit të Llogarasë ia dha kompanisë turke me ofertë 190 milion euro dhe jo kompanisë së dytë me ofertë 140 milion euro. Pas Batonit, me këto teza u vërsulën mbi publikun pa mëshirë pasi u paritën edhe Top Tuneli, Sokol B., Ymer Çorapje e shumë të paritur të tjerë.

Së katërti, ajo, tashmë e penduara e parë publike, të nesërmen e komunikimit të aktakuzës i kërkoi Ramës të mblidhte me urgjencë në selinë e PS qeverinë dhe kryesinë e PS. Në këtë mbledhje, me tone të egra kërcënuese të një prokuroreje, ajo iu drejtua të pranishmëve se “kushdo që do guxonte të çilte gojën, ajo do ta merrte me vete!”. Kurse Rama, duke i bërë një mbrojtje të plotë dhe pa kushte asaj, iu tha ministrave dhe anëtarëve të kryesisë së PS se SPAK-u ka sulmuar Partinë Socialiste dhe se Belinda nuk ka bërë asgjë, por gjithçka, e tëra kjo mesele është kundër tij, ndaj “mos guxoni ta sulmoni.”

Së pesti, kulmin e suksesit, Lubi Balluku, e penduara publike, e pati në kacafytjen prej 7 orësh me Edi Ramën në zyrën e tij.

Në këtë takim, Rama i kërkoi Lubisë dorëheqjen duke e siguruar se ai nuk do pranonte kurrë heqjen e imunitetit dhe arrestimin e saj, madje ai do bënte që SPAK-u të mos guxonte të kërkonte ndonjëherë një gjë të tillë. Kurse Lubia kërkoi prerë nga Rama që të mos zbatohej vendimi derisa ta shqyrtonte Gjykata e Lartë dhe të dërgonte ai dhe Këshilli i Ministrave kërkesën për pezullimin e vendimit të GJKKO.

Rama, në prani të dy dëshmitarëve, refuzoi kërkesën e saj të përsëritur që ai dhe Këshilli i Ministrave, dhe jo ajo vetë, t’i drejtoheshin Gjykatës Kushtetuese. Pas 7 orësh negociatash, Rama ndërpreu takimin për një darkë me mysafirë të lartë, dhe pas largimit të saj, u tha Ulziut dhe Don Agacios se pas darke ai di t’i mbushë mendjen asaj të japë dorëheqjen. Në fakt, ai takim nuk u zhvillua, sepse gjatë darkës Lubia i zuri atij kafshatën në fyt duke i dërguar me dhjetëra mesazhe, por edhe dokumenta dhe video nga dosja e SPAK-ut dhe arkiva e saj, me të cilat ia bëri darkën zeher dhe e bindi Ramën se dosja e Lubisë, de facto dhe de jure, ishte dosja më së pari e tij, dhe se aq sa mund të ndash tymin me blozën, mund t’i ndaje në atë dosje ata nga njëri-tjetri.

Të nesërmen, Rama, me të gdhirë, urdhëroi Don Agacion që, në një akt të pashembullt në historinë e Europës, të padisë në emër të tij dhe të Këshillit të Ministrave në Gjykatën Kushtetuese vendimin e GJKKO për pezullimin nga detyra të Lubisë.

Së gjashti, pas këtij vendimi, ata të dy u vërsulën publikisht dhe fshehtas me të gjitha mjetet e presionit ndaj anëtarëve të gjykatës. Rama mashtroi publikisht çdo ditë shqiptarët. Ai shkoi aq larg sa shpiku opinione të Komisionit të Venecias që nuk ekzistonin, të cilat, sipas tij, nuk lejonin pezullimin e ministrit (lexo: kryeministrit) nga gjykata. Kurse vetë Lubia u mor me paritjen e gjyqtarëve, por edhe postime në emailet dhe celularët e tyre të perlave të mëkateve të tyre nga arkivi i saj.

Në të vërtetë, Lubia, e penduara publike, arriti me shpejtësi të pabesueshme të shpërfytyrojë pa u mbledhur për vendim Gjykatën Kushtetuese, e cila, duke shkelmuar mbi Kushtetutën dhe precedentin e vet, caktoi ditën e shqyrtimit dhe shpalljes së paligjshme të pezullimit nga detyra të Lubi Ballukut më 12 dhjetor.

Si përfundim, miq, Lubia, e vetme por e penduar publike, triumfoi dhe tani, njëlloj si në balladë: “Cili viu, viu, viu, kush ia bën, ia bën vetiu”, keni parë s’keni parë, shkon një i vdekur me një të gjallë, të dy hipur në të njëjtin kalë!

gsh

Një grup të rinjsh janë mbledhur sot në qendër të qytetit të Bulqizës për të zhvilluar një protestë paqësore, pas humbjes tragjike të bashkëmoshatarit të tyre, Erjon Boba.

Me pankarta në duar dhe një heshtje simbolike, të rinjtë kërkuan më shumë siguri dhe vëmendje ndaj problemeve me të cilat përballet rinia sot.
“Të rinjtë duhet të ndihen të sigurt kudo,” tha një prej pjesëmarrësve, duke theksuar se protesta nuk është vetëm në nder të viktimës, por një thirrje për gjithë komunitetin.

Protestuesit kërkuan që institucionet të marrin masa më të forta për parandalimin e konflikteve, ofrimin e mbështetjes psikologjike dhe krijimin e hapësirave të sigurta ku të rinjtë mund të shprehen dhe të kërkojnë ndihmë.

Protesta u zhvillua qetësisht dhe u shndërrua në një thirrje të fuqishme për reflektim dhe ndryshim. Të rinjtë shprehën solidaritet me familjen e Erjon Bobës dhe apeluan që ngjarje të tilla të mos përsëriten më.

Edhe Barie Boba, e afërme e familjes së viktimës, dha një mesazh të qartë për rëndësinë e edukimit, kujdesit dhe parandalimit të ngjarjeve të tilla, si në rolin e edukatorit, ashtu edhe në atë të prindit.bw

Anëtari i Kryesisë së PD, Ervin Salianji, ka shpalosur projektin e tij për rrëzimin e qeverisë.

Gjatë intervistës në “Opinion”, Salianji tha se takimi me strukturat e PD në Durrës tregoi se demokratët kanë dëshirë për ta parë PD zgjuar dhe të ripërtërirë.

“Ishin 500 njerëz dje në takim. Dje në Durrës ishte struktura e PD. Ishte kryetari i degës, 2 nënkryetarët, sekretarin e degës, më të votuarit e primareve. Ishte Ilir Alimehmeti, Ndrec Pjetri, Aulon Kalaja, Hysen Kadiu. Shkova për të zgjuar dhe për të ripërtërirë PD-në.

S’mund të presim të vijnë zgjedhjet e tjera, të qajmë prap, unë dua të mund Edi Ramën. Anëtarësia e PD kërkon revoltë, ne bëjmë foltore. Anëtarësia kërkon analizë, ne themi zgjedhjet janë vjedhur”, tha Salianji.

I pyetur se çfarë synon me këtë lëvizje, Salianji tha se sot PD nuk po funksion.

“Kam një lloj kontributi në PD, opozitë bëj se dua, nuk paguhem, as kam interes personal, personale e ktheu Edi Rama se më dënoi për politikë”, tha Salianji.

Ervin Salianji: Ishin 500 njerëz dje në takim. Dje në Durrës ishte struktura e PD. Ishte kryetari i degës, 2 nënkryetarët, sekretarin e degës, më të votuarit e primareve. Ishte Ilir Alimehmeti, Ndrec Pjetri, Aulon Kalaja, Hysen Kadiu.

Shkova për të zgjuar dhe për të ripërtërirë PD-në. S’mund të presim të vijnë zgjedhjet e tjera, të qajmë prap, unë dua të mund Edi Ramën. Anëtarësia e PD kërkon revoltë, ne bëjmë foltore. Anëtarësia kërkon analizë, ne themi zgjedhjet janë vjedhur…

Nuk dua funksion në PD. Kam një lloj kontributi në PD, opozitë bëj se dua, nuk paguhem, as kam interes personal, personale e ktheu Edi Rama se më dënoi për politikë. bw

E ftuar në “News24 Fundjavë” ishte ekonomistja Romina Radonshiq e cila foli në lidhje me rritjen e pensioneve, sistemin e pagesave drejt digjitalizimit dhe parashikimet për vitin 2026, sipas raporteve të Bankës Botërore.

“Deri në këto momente flasim për numër të ulët të kontribuesve dhe numër të lartë përfituesish. Paqja fiskale lehtëson këtë gjë, por çedukon ata që kanë qenë të pa rregullt me kontributet”, tha ajo

Kushti aktual i 15 vite pune për të përfituar pension minimal duket se është “anomali” dhe penalizon shumë persona, veçanërisht ata që kanë punuar pak, emigrantët dhe punëtorët informalë.

Qeveria tashmë deklaron se po punon në “rikonstruktimin e skemës për pensionet” dhe se do të përdorë bonuse në varësi të kontributeve për të përmirësuar përfitimet për pensionistët.

“Ka shumë persona që nuk kanë qenë pjesë e tregut informal të punës. Ishin të punësuar por nuk u janë paguar kontributet nga punëdhënësi.

Duhet të ketë një amnisti për ata që kanë humbur vitet e punës. Duhet të kuptojmë që shumë individë nga padija nuk kishin dijeni. Si mund të futemi në BE duke i lënë këtë kategori pa asnjë pension minimal”, tha ekonomistja.

Ajo u ndal edhe në mundësitë e rritjes së pensioneve apo indeksimit të tyre, teksa u shpreh se duhet pasur parasysh që shpesh pensionistët kursejnë nga barnat e nevojshme për të kuruar sëmundjet e tyre kronike, në pamundësi tjetër për të ëzuar e për t’u bërë nipërve dhe mbesave dhurata.

Deputeti demokrat Edi Paloka, u shpreh sot se kryeministri Edi Rama sulmoi SHBA-të dhe presidentin Donald Trump, ndërsa u miqësua me BE-në, ndërsa pas tij ka pasur si mbështetje Sorosin.

I ftuar në emisionin “Kjo Javë” në “News 24”, ligjvënësi akuzoi kreun e mazhorancës se deri dje përdorte ambasadorët e SHBA dhe bënte presione nga salla e Parlamentit, kurse sot ka frikë dhe nuk shkon dot në SHBA.

“Frikë ka filluar të ketë edhe Rama, por jo me SPAK-un, por me ata matanë detit. Pse ka ndryshuar sjellja e Ramës. Ju mendoni se u bë kështu papritur dashnori i Europës Rama? A ndryshuar qasja nga përtej detit. Deri dje nuk guxonte të merrte frymë ambasadori ose ambasadorja amerikane, se shkonte në Kuvend Rama dhe na thoshte e patë, mori frymë e kishte me ju. Por ka ndryshuar marrëdhënia me SHBA, që me mosurimin për zgjedhjet e 11 majit. Që te mënyra se si reaguan për zgjedhjet që nuk e uruan. Keni dëgjuar ju që te urimi për Festën e Pavarësisë, festën Kombëtare t’i përmendet se ti mbështet narkotrafikantët, se ashtu ishte ajo trashë e trashë. Lufto, por mos u bëj ndihmës i tyre. I ka prerë gjithë shpresat“, tha ai.

Paloka hodhi edhe dyshime se diçka politike dhe diplomatike ka ndodhur, pasi Sorosi është non grata aktualisht në Amerikë dhe i ka prerë shpresat se do ketë më lajme pozitive andej.

Madje ligjvënësi nënvizon se ndoshta Rama vepron kështu që nesër të mbrohet e të thotë se po e godet SHBA se u doli kundër.

“Ka prerë të gjithë shpresat që andej do të ketë diçka pozitive, mendoj se mund të ketë edhe një informacion më shumë. Kur doli ky të thotë në media ndërkombëtare që SHBA nuk zgjidh çështje, ata hedhin bomba. Kur shau Trumpin kishte Sorosin ai nga pas, e mbronte Sorosi por tani Sorosi është vetë non grata tani. Mos po përgatitet që nesër të thotë po më godasin se u dola kundër?”, u shpreh deputeti i PD.

Paloka foli edhe për çështjen e nismës së qeverisë për të hapur 20 qendra pritjeje të emigrantëve në Shqipëri, duke e denoncuar si skandal.

Ai theksoi se qëllimi i kryeministrit Edi Rama është të shpopullojë Shqipërinë dhe ta kthejë në një vend për emigrantët.

“Reagova i pari për këtë sapo e pashë lajmin. Është skandali i radhës i qeverisë. Rama vazhdon përfiton që me të njëjtën strategji që skandali të mbulojë skandalin. E kemi dëgjuar dhe atë që u tha për Gjadrin. Ai tha se nuk do të kishte më kampe. Ky është skandal. Ky është projekt që sapo Rama të hynte në politikën me projektin e Soros. Ky e ka projekt zhdukjen e shqiptarëve. E përdor për të mbajtur në pushtet veten. Ato që ia bën Europës Soros, këtu e kanë shumë kollaj. Për ta jemi hiç. Të na përzënë ne dhe ta kthejnë këtë vend për emigrantët. Rama siguron pushtetin e përjetshëm dhe këtu ka skllevër”, tha ai mes të tjerash. gsh

Deputeti i Partisë Demokratike, Edi Paloka, ka komentuar situatën brenda opozitës dhe takimet e ish-deputetit Ervin Salianji me demokratët, duke u shprehur se nuk ishte lëvizje e duhur për situatën që ndodhet PD sot.

“Po flas në përgjithësi, mendoj se nga koha dhe momenti, lëvizja nuk është e duhura”, tha ai, ndërsa shtoi se “kur te duartroket armiku, shih rrotull se nuk është mirë”.

Paloka tha se priste të dëgjonte disa propozime në takimin e Salianjit në Durrës, por nuk pa diçka të tillë.

“Prita të dëgjoja nëse do kishte propozime. Jam me këtë idenë që nuk duhet të kemi përçarje. Të presim edhe një javë, se kam përshtypje se mund të ketë ndryshime”, tha ai.

Më tej deputeti demokrat theksoi se ka parë në takim shumë të rinj të angazhuar dhe njerëz të pakënaqur, por shtoi se ambiciet personale nuk duhet të dëmtojnë grupin e PD-së.

“Pash që ka djem të rinj, njerëz që duan të ndryshojnë diçka që PD të vijë në pushtet, kishte edhe njerëz që janë të pakënaqur, kanë pretendimet e tyre, nuk ka asgjë të keqe të kesh ambicie në politikë, përkundrazi, po të mos kesh ambicie nuk ke vlerë, por deri sa ambiciet e tua nuk i prishin punë grupit ku ti militon, s’ka asgjë të keqe”, tha ai.

Edi Paloka: Për këtë çështje, ndoqa takimin e Durrësit, isha kurioz të dija çfarë do ofrohen në atë takim. Pash disa nga bashkëpunëtorët të mi aty, që i vlerësoj shumë, pjesën më të madhe nuk e njihja, disa nga drejtuesit e partisë, ish-kryetarin e forumit Artoni, që foli aty. Pjesa tjetër, nuk e di çfarë ka ndodhur. Salianjin si koleg e vlerësoj, si të gjithë kolegët e tjerë.

Prita të dëgjoja nëse do kishte propozime. Jam me këtë idenë që nuk duhet të kemi përçarje. Të presim edhe një javë, se kam përshtypje se mund të ketë ndryshime, qoftë në intensitetin e kësaj. Pash që ka djem të rinj, njerëz që duan të ndryshojnë diçka që PD të vijë në pushtet, kishte edhe njerëz që janë të pakënaqur, kanë pretendimet e tyre, nuk ka asgjë të keqe të kesh ambicie në politikë, përkundrazi, po të mos kesh ambicie nuk ke vlerë, por deri sa ambiciet e tua nuk i prishin punë grupit ku ti militon, s’ka asgjë të keqe.

Nëse vë para interesin tënd, ambicien tende në një situatë që nuk është ajo e mira edhe në PD, për të përfituar personalisht nuk ka asnjë vlerë. Po flas në përgjithësi, mendoj se nga koha dhe momenti, lëvizja nuk është e duhura. Mjafton një kriter, kur te duartroket armiku, shih rrotull se nuk është mirë. Me sa di unë, Salianji nuk ka shprehur ndonjë dëshirë publikisht.gsh

Presidenti i Partisë së Lirisë, Ilir Meta, ka ngritur shqetësimin për mënyrën si po trajtohet çështja e detit me Greqinë, duke akuzuar qeverinë për mungesë transparence dhe veprime që, sipas tij, mund të dëmtojnë interesat e Shqipërisë.

Meta rikujton se çështjen e ka ndjekur për 13 vite, nga posti i ministrit të Jashtëm deri te ai i Presidentit. Ai paralajmëron se nëse Shqipëria i drejtohet Gjykatës së Hagës për “të gjithë çështjen”, dakordësitë e vitit 2018 rrezikojnë të shfuqizohen, përfshirë edhe vijën e drejtë bazë dhe 40 km² sipërfaqe detare.

Ish-presidenti apelon që çështja të mos trajtohet si “tender i fshehtë” dhe i bën thirrje institucioneve të veprojnë me transparencë, veçanërisht ministrisë së Jashtme, përpara vizitës në Athinë.

Reagimi i Ilir Metës:

ÇËSHTJA E DETIT SI INTERES KOMBËTAR, JO SI TENDER SEKRET

Çështja e Detit është jo vetëm shumë herë më e “thellë” se vetë Deti Jon, por edhe aq e shëmtuar fatkeqësisht, në kontrast të plotë me bukurinë përrallore të Jonit.

Këtë çështje, për shkak të detyrave shtetërore, kam qenë i detyruar ta ndjek për gati 13 vjet, prej funksioneve të larta, nga Ministër i Jashtëm në shtator 2009 e si President i Republikës deri në korrik 2022.

Akti i fundit zyrtar që kam bërë si President i Republikës, ishte informimi zyrtar nominal i çdo deputeti të Kuvendit lidhur me ecurinë e kësaj çështjeje gjatë pesë viteve që unë shërbeva si President i Republikës.

Ky akt synonte, jo vetëm realizimin e një transparence, por edhe ndërgjegjësimin për rëndësinë e vëmendjes që kërkonte kjo çështje tejet e koklavitur, por kurrë prej meje.

Dihet se falë ankimit të Partisë Socialiste, Gjykata Kushtetuese u investua duke nxjerrë një vendim të posaçëm kushtetues si udhërrëfyesi i vetëm për parimet dhe rrugët e negocimit deri në përcaktimin në detaje të rolit të çdo institucioni shtetëror.

Në respekt të këtyre detyrimeve kushtetuese, kam bashkëpunuar me Qeverinë, duke dhënë edhe autorizimin për krijimin e grupit negociator.

Por çuditërisht, në vitin 2018, pala greke kërkoi të operohej në bazë të vullnetit politik, çfarë nuk ishte kompetencë e grupit negociator.

Në këto rrethana të reja, si President i Republikës pres në takim Kryeministrin Rama për të ecur drejt zgjidhjes së kësaj çështjeje, e cila tani kishte vetëm një rrugë, autorizimin e Kryeministrit për drejtimin e negociatave.

Për mua kjo ishte plotësisht e logjikshme, duke patur në konsideratë se Kryeministri ishte edhe bartës i vullnetit të shumicës në Kuvend, roli i të cilit ishte dhe mbetet i pashmangshëm në çdo marrëveshje të tillë.

Por dakordësia e këtij takimi jo vetëm që nuk u shoqërua kurrë me një kërkesë për autorizim nga Kryeministri dhe Qeveria, por përkundrazi, u shoqërua me një ndërprerje të njëanshme të komunikimit institucional për këtë çështje, për të vazhduar më tej me dizinformacione ndaj palës greke sikur Presidenti i Republikës bllokonte procesin, aq sa Z. Avramopulos u habit pas takimit me mua për dy histori krejt të ndryshme që dëgjonte për të njëjtën çështje.

Jo vetëm kaq, por Qeveria vazhdonte sjelljet e saj jotransparente dhe Kryeministri, si shejtan-budalla, bënte edhe deklarata publike për këtë çështje, të cilat mund të rëndonin pozitën e shtetit shqiptar në gjykatat ndërkombëtare.

Aq shumë ishte helmuar pala greke me dizinformacione sa Ministri i Jashtëm atë kohë, Z. Dendias, në Maj 2022, pasi i refuzoi Ministres së Jashtme modifikimin e dakordësisë së 20 Tetorit 2020 që kishte arritur me Kryeministrin Rama, deklaroi se puna për mbylljen e Marrëveshjes së Detit do të fillonte sapo në zyrë të hynte Presidenti i ri i Shqipërisë (pra të ikte Meta).

Sot që unë po shkruaj këto rradhë kanë kaluar tre vjet e gjysmë që nuk jam në zyrën e Presidentit, por jam në një “zyrë” të re edhe për shkak të (mos) Marrëveshjes së Detit.

Meqenëse këtu në “zyrën” e re, u informova nga mediat shqiptare, të cilat ishin informuar nga mediat dhe autoritetet greke, për vizitën e afërme të Ministres së Jashtme të vendit tonë, ku theksohej se temë kryesore do të ishte edhe Çështja e Detit, vetëm në interes të suksesit të kësaj vizite, por edhe mbrojtjes konstruktive e legjitime të interesave sovrane të Shqipërisë, do të doja të ndriçoheshin sa të ishte e mundur disa pyetje dhe disa çështje jetike, për të cilat nuk flitet askund.

Në 20 tetor 2020, Rama-Dendias ranë dakord të shkojnë në Hagë për Detin, si dhe të shkojnë për gjithë çështjen, duke bërë kështu NUL negociatat dhe dakordësitë e vitit 2018.

Kur u mor vendimi nga Kryeministri, nuk kishte dhe ende nuk ka (në dijeninë time) grup negociator.

Pas autorizimit duhet të ngrihet Grupi Negociator për hartimin e Marrëveshjes Speciale të ratifikuar nga dy vendet dhe që i paraqitet Gjykatës Ndërkombëtare.

Kjo Marrëveshje përmban pyetjet për gjykatën, që zakonisht kërkon zgjidhjet për mosdakordësitë.

Vendimi i Kryeministrit Rama për të shkuar në Hagë për të gjithë çështjen është jashtë kompetencave të tij kushtetuese dhe ngritja e grupit sot nënkupton legjtimimin e vendimit të tij (faktit të kryer).

Çfarë u arrit në vitin 2018 sipas dijenisë time?

U reflektuan vendimet e Gjykatës Kushtetuese:

Titulli i Marrëveshjes, parimi i delimitimit, me distanca të barabarta dhe korrektuar për Equitenë, u hoq neni 2 i Marrëveshjes, u vlerësua kufiri në Gjirin e Ftelias.

Përveç këtyre, Greqia njohur vijën e drejtë bazë të Shqipërisë me efwkt 40 km katrorë dhe si bazë ligjore në tekst u përfshi Protokolli i Firences i 1925 për kufijtë tokësorë.

U dakordësua teksti i Marrëveshjes, vija me distanca të barabarta, si dhe parimi i Equitesë për shkëmbinjtë në detin territorial dhe ishujt në Shelfin Kontinental dhe ZEE.

Çfarë ndodh nëse shkojmë për të gjithë çështjen në Hagë?

Dakordësitë e 2018 bëhen NUL dhe e gjithë çështja konsiderohet mosdakordës.

Bie përfshirja e Protokollit të Firences 1920 në draft-marrëveshje.

Bie sipërfaqja 40 km katrorë, sepse rrezikojmë të na rrëzohet vija e drejtë bazë.

Nëse shkohet për të gjithë çështjen në Hagë, vija e drejtë bazë do të përbëjë mosdakordësi dhe do merret në shqyrtim nga GJND dhe gjasat janë ta rrëzojë. (precedenti Somali- Kenia).

E vetmja mundësi që Greqia ta rrëzojë vijën e drejtë bazë të Shqipërisë është një vendim gjykate.

Ndërkohë që Greqia e njohu në negociatat e 2018, sepse nuk kishte mundësi ta kontestonte në rrugë diplomatike.

Kështu do të humbisnim 40 kilometra katrorë. (Pse)

Këtë në dijeninë time e konfirmon edhe kompania e Znj. Blair “Omnis Trategy”, që u pagua 3 milionë euro dhe dorëzoi raportin finale me konkluzionin se “rrezikoni vijën e drejtë bazë në Hagë”.

Ishte pikërisht ky raport dhe konkluzion edhe i “Omnis Strategy” që e detyroi Ministren e Jashtme, Znj. Olta Xhaçka në maj 2022, t’i kërkonte homologut grek Z. Dendias, modifikimin e dakordësisë të 20 tetorit 2020, Rama-Dendias, që u refuzua nga ky i fundit, që mezi priste largimin e Presidentit të Republikës.

Meqënëse po bëhen katër vite që e kemi paguar 3 milion, euro “Omnis Strategy ” kur do të njihemi me konkluzionet dhe vlerësimet e saj?

A e ka Presidenti i Republikës këtë raport të plotë? Po Kryetari i Kuvendit?

Po Kryetarët e Grupeve Parlamentare? Po Komisioni i Ligjeve? Po Komisioni i Jashtëm?

A janë në dijeni këto institucione dhe funksionarë për shkak të detyrës së tyre nëse Greqia ka dorëzuar një draft të Marrëveshjes Speciale për negocim?

Po për përmbajtjen e draft-marrëveshjes të MEPJ?
Për çfarë do shkohet në Hagë?
Për të gjithë çështjen apo vetëm për çfarë nuk është rënë dakord në 2018?
A ka përputhje dhe për çfarë çështjesh midis draftit grek dhe atij shqiptar për Marrëveshjen Speciale?

Ju lutem të gjithëve të mos e trajtoni çështjen e Detit si tokat e Gjipesë ose tender sekret, sepse nuk do të ketë më mundësi korrigjimi.

Ndaj në mënyrë transparente, konstruktive dhe profesionale, ndihmojeni edhe Ministren e Jashtme të ketë një vizitë të suksesshme në Athinë.
Edhe një konsultë me negociatorët e 2018, nuk do të ishte humbje kohe. Po kështu edhe me ish-anëtarët e nderuar të Gjykatës Kushtetuese. bw