Si “heroi i heshtur” u bë llafazan- Poezi nga FATBARDH AMURSI

November 8, 2025

Oh, sa shumë paska shërbyer ky skuthi,

që, me një raport mjeksor,

shmangu detyrimin ushtarak?!

Ditën e parakalimeve

u duk i harruari

me një shirit të kuq në krah.

Sfilitesha në pyetjen hamletiane:

se ku i heshturi flet,

pasi ka përgjuar pas dere,

Që, me gjasa,

na qënkish ruajtur haleja

dhe prej meje?!

Erdh kohë e ballafaqimeve me të djeshmen

dhe film i jetës kthehet nga e para,

engjëlli dhe zuzari?!

Por, nga kamuflimi me gjethe tek ndërhyrjet estetike,

nuk po njihet më

ai i pari.

Në të gjithë sekuencat “heroi i heshtur”:

o mban shënime në fund të sallës,

o diçka i thotë në vesh shefit serbes,

Duke i sugjeruar,

se kush duhet përjashtuar nga gara

dhe kush të futet në “listën e zezë”.

I heshturi,

tani është bërë llafazan,

s`ka ushqim tjetër për të veç prehës.

Duket sikur ujin e ngre në hava

dhe me shtizën e helmtë gjer në ashtë

me gjasa po i futet së keqes.

M`u sul si bombat e luftës

që shpërthejnë në paqe,

por veten haleja hodhi në erë.

Dhe në vend të gjakut

pamë të llahtarisur,

si nga trupi i tij dilte veçse vrerë.

Heroi i heshtur si një kamikaz

ra theror me pengun,

që s`më groposi dot.

Minat,

bombat

dhe granatat e paplasura të luftës,

vazhdojnë të vrasin dhe sot…

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi