Gjatë debatit për zgjedhjet e 11 majit në ‘Çim Peka LIVE’, gazetari Armand Shkullaku është shprehur se, me votat e diasporës është bërë një kasaphanë.

Sipas Shkullakut, këto vota kanë qenë të pakontrolluara dhe nuk kishe si ti ruaje.

Gazetari dha shembuj, ku sipas tij ka pasur 200 fletë të palosura dhe të firmosura nga e njëjta dorë.

‘Me votën e diasporës po rezulton se është bërë një tjetër kasaphanë. Nuk është pyetur as për kontratën, nuk janë kontrolluar as si kanë votuar, as si kanë mbushur fletët e votimit.

Aty dolën që ishin 200 fletë të palosura dhe të firmosura nga njëra dorë.

Dua të them që opozita duhet të jetë e qartë në këtë gjë, ka hyrë në një betejë që mund të zgjasë, që duhet të bëjë të gjitha format e rezistencës.

Nuk mund të hysh në një betejë duke u thënë njerëzve se do të fitojmë, edhe pse e di se nuk fiton dot.

Në 2021, u vodh, u shkatërrua, u morën në mënyrën më të pabesë votat. Unë e quaj gabimin dhe tmerrin e Edi Ramës, duke ndryshuar Kodin Zgjedhor në mënyrë të njëanshme, duke shkelur çdo rregull loje, edhe në kundërshtim me rekomandimet e OSBE e Komisionit të Venecias, shumë më të rëndë se sa faktin se, vetë iku nga parlamenti’, tha ndër të tjera Armand Shkullaku në SYRI TV.