Presidenti i Ukrainës, Volodymyr Zelensky, i ka bërë thirrje presidentit amerikan Donald Trump që të ngrejë tonet ndaj Vladimir Putinit, duke e siguruar se lideri rus “nuk është më i fuqishëm se Hamasi”.

Në një intervistë të dhënë të premten dhe të transmetuar sot nga rrjeti televiziv NBC, Zelensky theksoi se është urgjente të ushtrohet presion ndaj Moskës për t’i dhënë fund luftës në Ukrainë.

“Pikërisht për këtë arsye duhet ushtruar presion ndaj Rusisë”, deklaroi ai, duke lënë të kuptohet se qasja pajtuese nuk funksionon me Putinin.

Donald Trump ka premtuar se do t’i japë fund luftës në Ukrainë dhe konfliktit në Rripin e Gazës, sapo të rikthehet në Shtëpinë e Bardhë. Megjithatë, realiteti në terren po tregon se këto sfida janë shumë më komplekse nga sa ai kishte shpresuar.

Pasi siguroi një marrëveshje armëpushimi në Gaza më 10 tetor, e cila tashmë është në prag të shembjes, Trump ka vendosur si qëllim të bëjë të njëjtën gjë në Ukrainë.

Të premten ai priti në Shtëpinë e Bardhë presidentin ukrainas Zelensky, të cilin e shtyu drejt një ndalimi të luftimeve, ndërsa refuzoi kërkesën e tij për ndihmë ushtarake shtesë.

Paralelisht, Trump ka rifilluar bisedimet me Vladimir Putinin, dhe të dy kanë rënë dakord për një takim në Budapest, i cili pritet të mbahet së shpejti.

Zelensky shprehu gatishmërinë për të qenë pjesë e këtij takimi trepalësh, duke deklaruar për NBC: “Jam gati. Ia kam thënë presidentit: ‘Jam gati’.”

Ai shtoi se Trump kishte interes të dëgjonte mendimin e tij, duke konfirmuar se: “Ai do ta ndajë këtë qëndrim me Putinin”.

Sipas presidentit ukrainas, paqe e drejtë dhe e qëndrueshme kërkon dy palë, duke nënkuptuar se nuk mund të arrihet marrëveshje pas shpine ndaj Ukrainës. Panorama