Protagonistët e rremë- Poezi nga FATBARDH AMURSI

December 13, 2025

Po i mbyllin shtigjet e së nesërmes,

protagonistët e rremë,

kusari që të zë pritë

na mbahet si udhërrëfyes,

Novatorët,

avanguardistët,

dje këta i quanin dekadentë,

sot si demode e plotë epitete fyes.

Përherë të avantazhuar:

për shkak të pushtetit

ofiqeve të pamerituara,

lidhjeve klienteliste,

Duke shkëmbyer favore

livadhisin në panairin e kotësive.

Pasi i marrin të gjithë

ankohen për kismete të vjedhura,

se u ke hyrë në hak,

Atë çka për vetë e gatisin,

si hark triumfi

ty duan ta kthejnë në lak.

I pretendojnë majat

duke u zvarritur,

duke u shpallur fitues pa garë,

Ngjitu ti po deshe në Everest,

i katapultuari

prapë të del i parë.

Aty ku heroi s’është më një aspiratë,

ku në luftën e bërrylave

gjoksi del jashtë mode,

si relike.

Dhe sheshi i burrave nga duel titanësh

kthehet në një sofër poetike.

Ngaqë s’ecin vetë

s’duhet të ecësh as ti

dhe zënë pikat kyçe,

ku s’ke nga ia mban,

Atdheu rrezikon të mbetet

peng i protagonistëve të rremë,

ku përherë i zoti do bëhet kurban.

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi