Presidenti amerikan, Donald Trump dha deklarata të reja optimiste për ecurinë e bisedimeve të paqes mes Rusisë dhe Ukrainës, duke sqaruar se plani 28-pikësh i SHBA-së nuk është një marrëveshje përfundimtare, por “vetëm një hartë” drejt një zgjidhjeje.
Ai konfirmoi se Uashingtoni po përparon në përpjekjet diplomatike, ndërsa paralajmëroi takime të reja të nivelit të lartë në Moskë.

“E gjitha kjo ishte një hartë, jo një plan. Ishte një ide,” deklaroi Trump, duke shpjeguar se nga 28 pika fillestare, palët kanë rënë dakord për 22.

Sipas tij, bisedimet me Rusinë kanë qenë “të mira”, ndërsa Ukraina është “mjaft e kënaqur me procesin”.

Presidenti amerikan shtoi se Moska ka bërë “lëshime të mëdha”:

“Ata ndalojnë së luftuari dhe nuk po pushtojnë më territor.”

Megjithatë, Trump pranoi se dinamika e negociatave mbetet e ngadaltë. “Është një proces i ndërlikuar… Evropa me të vërtetë dëshiron që kjo të mbarojë sa më shpejt.”

Lidhur me afatin kohor të mundshëm të një marrëveshjeje, Trump ishte i prerë: “Afati është kur të mbarojë. Të gjithë janë lodhur duke luftuar.” gsh