Poeti i persekutuar në varrin e vëllait dëshmor- Poezi nga FATBARDH AMURSI

October 16, 2025

Vëllai dëshmor

s’ishte Konstandini,

të ngrihej nga varri

e t’i shkonte vëllait në qeli,

Edhe fantazëm të ishte

do e ndalonin gardianët t’i bënte shoqëri.

.

Ishin në një llogore dhe i vunë përballë,

ishin për prishjen e gjerdheve

ata ngritën mure,

Kujtuan se ishte koha e kreshnikëve,

por kush guxonte:

shtonte numrin e të zhdukurve.

.

Vëllai i persekutuar

me të dalë nga burgu

i shkoi vëllait dëshmor tek varri,

Ishte si të ktheheshe tek bariu

kur qe i shënuar për tek kasapi.

.

Njëri u vra në lule të rinisë

tjetri rininë e kaloi në burg,

Ndërsa e dashura pranoi të merrte

si kompesim: një tjetër burrë.

Ishte ai,

që të gjitha fotot

i bënte në lulishten e qytetit,

Ai që njërin vëlla

e çoi para togës së pushkatimit

dhe tjetrin pas hekurave të ferrit.

.

-Erdha të shmallem

aq sa i gjalli mundet,

sa shumë kam për të thënë,

por i dënuar të flas me të vdekurit,

Ne që i shërbyem pa hile atdheut

na vuri përposhtë ai,

që në të gjitha kohërat

shpërblehet me tituj nderi?!

.

Doja Shqipërinë që ti ëndërroje

por ajo që shihja ishte tjetër gjë,

dhe në emrin tënd reagova unë,

Kështu që në poezitë që shkruaja

ishte ideali yt,

por ata me Stalinin m’u kundërvunë!!

.

Në fillim vidhet fitorja,

që kish dhe emrin tënd,

Më pas u përvetësua merita

ndër ta dhe e imja

Dhe në fund grabitej pushteti

që ishte i yni,

Dhe për t’na poshtëruar,

doli në skenë prapë spiuni.

.

Të tjerë me një dëshmor bënin namin,

merrnin ofiqe,

dilnin në tribuna,

merrnin autorizime,

Ndërsa ti vleje më pak

nga një fuks

apo nga ai që shkruante letra anonime.

Unë isha turpi yt

tani duhet t’më vijë mua zor prej teje?!

Se cilët jemi ne

përherë do e thonë

ca vemje.

.

Jetën e dhe për atdheun

mos unë duhet të vritem për tokat e babait,

grabitur me letra të falsifikuara?!

Dhe zot i tyre po dihet

ai që të shiti ty dhe mua.

Por më të neveritshëm janë ata

që na e qajnë hallin në postmortum,

Që u bënë me kundërshtarët,

kur injoroheshe ti

dhe vuaja unë…

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi