Si shtet sovran dhe demokratik, Kosova ka të drejtë të tërhiqet nga çdo marrëveshje ndërkombëtare që bie ndesh me interesin e saj kombëtar, me rendin kushtetues, apo me parimet themelore të funksionimit shtetëror. Kjo nuk është as dëshirë politike, as kapriço diplomatike, është një e drejtë e garantuar nga e drejta ndërkombëtare.

Konventa e Vjenës për të Drejtën e Traktateve e thotë qartë: nëse një marrëveshje është nënshkruar në kundërshtim me kushtetutën, ose nëse rrethanat kanë ndryshuar rrënjësisht, shteti ka të drejtë të tërhiqet. Dhe Kosova, sot, ndodhet pikërisht në këtë situatë.

Ne nuk mund të jemi peng i marrëveshjeve të vjetra, që jo vetëm nuk janë zbatuar nga pala tjetër, por që gjithashtu e minojnë sovranitetin, funksionimin demokratik dhe vullnetin e qytetarëve tanë. Marrëveshjet që bien ndesh me Kushtetutën janë, thjesht, të pavlefshme.

Prandaj, përfaqësuesit e institucioneve të Kosovës, kanë jo vetëm të drejtën, por edhe detyrimin moral dhe kushtetues që të veprojmë në mbrojtje të republikës sonë.