Nga New York Times

Një zyrtar i lartë i FBI-së dikur sinjalizoi drejtuesit kinezë se do të arrestoheshin, duke kompromentuar një hetim të madh penal. Kjo u zbulua nga raporti i Departamentit të Drejtësisë që evidentoi detaje të reja të dëmshme në Byro lidhur me shkeljet e zyrtarit të kundërzbulimit në New York.

Në të paktën një rast, një i dyshuar ka të ngjarë ta ketë shpërfillur paralajmërimin nga agjenti, Charles McGonigal, sepse një anëtar i familjes Biden vuri në dyshim vërtetësinë e tij, thuhet në raportin e inspektorit të përgjithshëm të Departamentit të Drejtësisë.

McGonigal, i cili doli në pension nga Byroja në vitin 2018, pranoi fajësinë në vitin 2023 se kishte punuar fshehurazi për një oligark rus dhe për krime të tjera, dhe tani po vuan një dënim me burgim gjashtë vjet e gjysmë.

Raporti, i publikuar të enjten, risjell një nga skandalet më serioze të fundit për FBI-në. Zbulimet vetëm sa e thellojnë intrigën që ka rrethuar një burrë që dikur ishte një nga kapësit më të lartë të spiunëve amerikanë.

Duke përshkruar punën e McGonigal në mbikëqyrjen e një hetimi mbi një biznes kinez, raporti e quajti keqbërjen e tij “të jashtëzakonshme” dhe zbuloi se ajo pothuajse çoi në akuza shtesë ndaj tij, për pengim të drejtësisë.

“Përmes skemës së tij, McGonigal qëllimisht dëmtoi një çështje të rëndësishme penale, shkelu besimin publik dhe komprometoi integritetin e FBI-së,” përfundoi raporti.

Një avokat i McGonigal nuk iu përgjigj menjëherë një kërkese për koment.

Raporti rrëfeu se si vetë McGonigal pranoi disa nga veprimet në fjalë gjatë një interviste vullnetare me hetuesit, në atë që njihet si një seancë proffer. Në seancë, ai pretendoi se “mburrja” e kishte motivuar atë të zbulonte informacion mbi hetimin. “Megjithatë, ai tha se nuk duhej të kishte shkuar aq larg sa bëri,” tha raporti.

Detajet e reja i përkasin një hetimi të vitit 2017 nga FBI mbi një think tank të financuar nga Kina të quajtur China Energy Fund Committee, dhe disa kompani të lidhura.

Nëpërmjet një sërë bisedash personale me dikë në China Energy Fund Committee, McGonigal i dha sinjal dikujt që punonte për firmën, të përshkruar në dokumente vetëm si “Personi B”, se FBI planifikonte të arrestonte një nga drejtuesit e think tank-ut, Patrick Ho, thuhet në raport.

McGonigal “pengoi një hetim penal që ai po mbikëqyrte atëherë duke zbuluar informacion të ndjeshëm, jo publik mbi subjektet dhe objektivat e hetimit tek një shtetas i huaj,” tha raporti, duke shtuar se ai gjithashtu mbajti “informacion të rëndësishëm për çështjen nga agjentët hetues të FBI-së në Nju Jork”.

The New York Times më parë e ka identifikuar “Personin B” si Dorian Duçka, një ish-zyrtar i qeverisë shqiptare që ndihmoi në krijimin e disa kontakteve biznesi për McGonigal.

Gjatë një darke me Duçka në qershor 2017, zoti McGonigal i tha atij se agjentët e tij po hetonin China Energy Fund Committee. Të nesërmen, Duçka u takua me zotin Ho në Uashington dhe ia përcolli sinjalin.

Më vonë atë vit, kur Duçka po konsideronte nëse mund të vinte në Shtetet e Bashkuara për një aktivitet të lidhur me China Energy Fund Committee, McGonigal e këshilloi të qëndronte në Shqipëri. Duçka e interpretoi këtë si një shenjë që FBI po përgatitej të bënte arrestime, sipas raportit të inspektorit të përgjithshëm.

Drejtuesit kinezë dukeshin të pasigurt nëse duhet t’i besonin sinjalit. Në nëntor, James Biden, vëllai i Joseph R. Biden Jr., i cili në atë kohë ishte jashtë detyre, punësoi një ish-agjent të Shërbimit Sekret për të përcaktuar nëse autoritetet amerikane, në fakt, planifikonin ta arrestonin zotin Ho nëse ai vinte në Shtetet e Bashkuara.

Ish-agjenti i Shërbimit Sekret u tha hetuesve se James Biden i kishte thënë atij se “ne kemi informacion nga Kina se Ho mund të arrestohet,” dhe se Ho ende donte të udhëtonte në Shtetet e Bashkuara, por ishte i shqetësuar për rezultatin.

Mesazhet që ish-agjenti i dërgoi një ish-kolegu tregonin se atij po i kërkohej, në thelb, të verifikonte informacionin në sinjalin e McGonigal disa muaj më herët. Por përderisa ai hetim, dhe çdo akuzë, ishin ende sekret të mbajtur nga FBI, rishikimi i bazave të të dhënave nga ish-agjenti nuk tregoi asnjë urdhër-arresti për zotin Ho ose bashkëpunëtorë të tjerë.

I pyetur për këtë para Kongresit, megjithatë, James Biden dha një shpjegim tjetër për kërkesën e tij, duke qenë se ai dhe nipi i tij Hunter Biden po përpiqeshin të krijonin marrëveshje biznesi në atë kohë me China Energy Fund Committee.

I ngushtuar nëse ai kishte kërkuar nga ish-agjenti i Shërbimit Sekret “të përpiqej të identifikonte nëse kishte apo jo një hetim federal para se ju dhe Hunter Biden të shkonit të takonit Patrick Ho në mënyrë që të mund ta informonit Patrick Ho nëse kishte një aktakuzë,” zoti Biden u përgjigj: “Absolutisht jo.”

Ai gjithashtu pohoi se e kishte bërë kërkesën sepse donte të dinte nëse do të ishte problematike për veten e tij dhe Hunter Biden të takonin zotin Ho në Azi.
“Thjesht doja të dija, e dini, nëse kishte ndonjë çështje me Patrick Ho. Jo për ta informuar apo ndonjë gjë tjetër,” tha James Biden. “Vetëm për vetëdijen time.”

Një avokat i Biden nuk iu përgjigj menjëherë një kërkese për koment.

Hetuesit e FBI-së më vonë përfunduan se zoti Ho vendosi të vizitonte Shtetet e Bashkuara pasi “ka të ngjarë iu tha, bazuar në informacionin e dhënë nga një hetues privat, se ishte e sigurt për Ho të kthehej në Shtetet e Bashkuara.”

Pas mbërritjes në Shtetet e Bashkuara, zoti Ho u arrestua nga agjentët e FBI-së. Ai u dënua në një gjyq në vitin 2018.

Një nga objektivat e tjerë të hetimit, një izraelito-amerikan, vendosi si rezultat i sinjalit të zotit McGonigal për China Energy Fund Committee që edhe ai mund të ishte objektiv i FBI-së. Ai papritur vendosi të mos vinte në Shtetet e Bashkuara, siç kishte planifikuar, tha raporti. Si rezultat, FBI humbi mundësinë për të kontrolluar shtëpinë dhe telefonin e tij, siç kishin planifikuar, përfundoi inspektori i përgjithshëm.

Regjistrat gjyqësorë dhe një person i njohur me çështjen tregojnë se njeriu në fjalë është Gal Luft, i cili u akuzua në vitin 2023 për akuza duke përfshirë shkelje të sanksioneve, trafik armësh, dështim për t’u regjistruar si agjent i huaj dhe dhënie deklaratash të rreme agjentëve të FBI-së në vitin 2019. Luft i ka mohuar akuzat, dhe ka pretenduar se ka informacion dëmtues kundër familjes Biden.