Komisionerja Europiane për Zgjerimin, Marta Kos, ka dhënë një mesazh të fortë nga Forumi i Bledit në Slloveni, ku ka marrë pjesë edhe Kryeministri Edi Rama.

Në fjalën e saj, Kos theksoi se procesi i integrimit europian për vendet e Ballkanit Perëndimor nuk ka rrugë të shkurtra dhe se prioriteti mbetet zbatimi i reformave, forcimi i shtetit të së drejtës dhe garantimi i lirisë së medias.

“Që të jemi në gjendje të pranojmë këto vende, ato duhet të zbatojnë reformat. Sundimi i ligjit dhe media e lirë janë të panegociueshme”, deklaroi Kos, duke shtuar se procesi nuk ka të bëjë vetëm me vendimmarrjen në Bruksel, por edhe me mbështetjen që qytetarët e vendeve kandidate japin për integrimin.

Sipas saj, udhëheqësit politikë duhet të tregojnë vizion dhe të vendosin interesin e reformave mbi politikën e ditës. “Ky proces nuk mund të jetë i suksesshëm pa udhëheqës që i shtyjnë qytetarët drejt këtij qëllimi. Ne kemi nevojë për udhëheqës që i vënë reformat mbi punët e përditshme dhe dinë të zgjidhin çështjet dypalëshe”, u shpreh Komisionerja.

Kos paralajmëroi se ndryshimet gjeopolitike e bëjnë integrimin edhe më urgjent, duke përmendur forcat e jashtme që përpiqen të dështojnë procesin europian, përfshirë ndikimin rus në Moldavi. bw