Presidenti i SHBA-së, Donald Trump, dhe presidenti rus, Vladimir Putin, do ta fillojnë samitin e tyre në Alaska me një bisedë kokë më kokë, me ndihmën e përkthyesve, përpara se të vazhdojnë bisedimet gjatë një dreke pune, sipas Kremlinit.

Por nuk janë vetëm dy krerët e shteteve përkatëse që do të marrin pjesë në samit, pasi të dy shoqërohen nga delegacione të rëndësishme me zyrtarë të lartë të institucioneve të ndryshme.

Shtëpia e Bardhë njoftoi se 16 zyrtarë do të udhëtojnë me presidentin, përfshirë Sekretarin e Shtetit Marco Rubio, Sekretarin e Thesarit Scott Bessent, Sekretarin e Tregtisë Howard Lutnick, Drejtorin e CIA-s John Ratcliffe, Sekretaren e Shtypit të Shtëpisë së Bardhë Karoline Leavitt dhe të dërguarin special të SHBA-së Steve Witkoff.

Nuk është e qartë se kush nga këta zyrtarë do të jetë në dhomë me përfaqësuesit e Rusisë. Javën e kaluar, Witkoff u takua me Putinin për bisedime në Kremlin, të cilat hapën rrugën për samitin e Alaskës.

Pesë negociatorët e tjerë të Rusisë do të përfshijnë ndihmësin e Putinit për politikën e jashtme, Yury Ushakov, Ministrin e Jashtëm rus Sergey Lavrov, Ministrin e Mbrojtjes Andrey Belousov, Ministrin e Financave Anton Siluanov dhe Kirill Dmitriev, një negociator i lartë ekonomik dhe kreu i fondit sovran të pasurisë së Rusisë.

Përfshirja e zyrtarëve që merren me çështje ekonomike sugjeron që pikat e diskutimit mund të shkojnë përtej luftës.

Sakaq, asnjë zyrtar nga Ukraina nuk do të jetë i pranishëm në samit, pavarësisht thirrjeve nga Kievi dhe aleatët e tij evropianë që vendi të ketë një vend në tryezën e bisedimeve. Trump ka sugjeruar se qëllimi i tij është të shkojë drejt një takimi të mundshëm trepalësh me Presidentin ukrainas Volodymyr Zelensky. bw