VOAL

MJAFT ME TOPITJE – Cikël poetik nga RUZHDI GOLE

September 18, 2025

MJAFTUESHËM

Nuk dorëhiqet vala nga bregu

bregu nga shkëmbinjtë

nuk dorëhiqet,

karfica e reve plasaritet

kur zbret poshtë

në mjegull

idhulli i të mëdhenjve

vranon, kërcen vetull

pa u kërcënuar nga ligjet.

Vala valën mbulon, e ledh, s’e shkel

nuk plagoset as shkuma e saj

në shkëmbenj.

Midis rrezeve rrezëllitëse

po s’u nxeha

tërhiqem…

I GJITHI

Ja, atje tej Deti … ja, atje Deti…

më poshtë se frymorët krah tyre

më lart nga të gjithë shandanët

më krenar se gjithë mbretërit.

Atje këtu deti…

FARË MOLLE

Shko e shkul…

t’u shkulshin rrënjët !

Molla s’bëhet mollë

pa hënën.

Shkul e shko…

t’u thafshin hapat !

Zë mallkimi dhe vet gjëmën,

gjëma vet çahet nga shpatullat.

Afër mbill, vadit dhe korr,

sot ta kraharosh një rit

vlim hëne, farëmollë.

Paskan sy uji, ajri ?

KLIMË

Ç’bubullima, oh, ç’bubullima

ta shurdhojnë njerin vesh,

tjetri vuan nga klima

pa asnjë

rrezë.

Frymëmarrja ngjit thëllimet,

gishtat më afrojnë

kopshtet e retë

grushtet e bubullimave.

DREJTSHKRIM

Karta të përcëlluara nga xixa e syrit

karta shurdhe nga timpan i rreshtit,

karta marramendëse prej dylli

dhe vula demokratike

nga sarajet e shtetit.

Mesdita sikur shkau, … nga ç’majë?

dhe ra, … në cilin hendek ?

si kodër e sapo vithisur

prej karte njerëzore

gjak dhe djersë.

GRACKA

O mos dil, o mos dil

era erës i thyen brinjë.

Mos dil, mos

shiun pi kjo vetëtimë

edhe qafën thyen përposhtë.

O mos dil, gracka në mes

vet marrosja nuk ka

stinë

s’qan as qesh.

SHITBLERJE

Shesim fanitje dhe tymnaja

shesim mollë të gjinjve

trazime nga belaja.

Shesim bekime t’gënjeshtërta

shesim flamuj dhe rrecka

ca nga gjymtyrët,

shesim kufinj me gjysmë gjurme

të cilët përjashta i kanë eshtrat

dhe kombajna që korrin veç fjalë

fjalës ia shkërmoqin xixat

ia mpijnë frymën.

Ç’të shesim poshtëpërpjetë tjetër?

Vezët e reja presim, qandej

do dalin njerëz

duke uluritur

a tek tuk

njerëz..

MJAFT ME TOPITJE

Mjaftueshëm me rreze

mjaftueshëm me rrasa,

mjaftueshëm

me shpresa

këqyrje të rrufeshme

ecejake të ngathëta.

Mjaftueshëm me drethkla

vrulle plot plasaritje,

mjaftueshëm me thithka

trauma urgjencash

mjaft me topitje.

Asnjëherë s’është

mjaftueshëm

të rritesh…

twitter
Follow
facebook
linkedin

Fjalë kyçe: RUZHDI GOLE

twitter
Follow
facebook
linkedin

Send this to a friend