Sot (22 shtator) Franca dhe Arabia Saudite do të udhëheqin të hënën një samit ndërkombëtar për zgjidhjen me dy shtete mes Izraelit dhe Palestinës, duke bashkuar dhjetëra vende, shumë prej të cilave pritet të njohin shtetin e Palestinës.

Ky zhvillim i ri vjen në një kohë tensioni ekstrem në Lindjen e Mesme dhe pritet të shkaktojë reagime të forta, sidomos nga Izraeli dhe Shtetet e Bashkuara, të cilat e kanë kundërshtuar ashpër nismën dhe kanë bërë të ditur se do ta bojkotojnë samitin.
Ambasadori izraelit në OKB, Danny Danon, e cilësoi takimin si “një cirk politik”, duke deklaruar:

“Ne nuk mendojmë se kjo ndihmon. Në fakt, po shpërblen terrorizmin.”

Izraeli paralajmëron masa ndaj Francës – SHBA kërcënon vendet që njohin Palestinën

Zyrtarë izraelitë kanë deklaruar se po shqyrtojnë mundësinë e aneksimit të pjesëve të reja të Bregut Perëndimor si kundërpërgjigje ndaj këtij samiti dhe se janë në konsiderim edhe masa kundër Francës.

Edhe administrata amerikane ka paralajmëruar se mund të ketë pasoja për çdo vend që ndërmerr veprime kundër Izraelit, përfshirë Francën, presidenti i së cilës, Emmanuel Macron, po e pret takimin në Nju Jork.

Samiti mbahet në prag të Asamblesë së OKB – përshkallëzohen tensionet në Gaza

Takimi vjen vetëm pak ditë përpara fillimit të Asamblesë së Përgjithshme të Kombeve të Bashkuara dhe në një moment kritik: Izraeli ka nisur një ofensivë tokësore të madhe kundër Gazës, ndërsa sulmet nga kolonët izraelitë në Bregun Perëndimor janë rritur ndjeshëm.

Një ndjenjë urgjence është duke u rritur mes komunitetit ndërkombëtar, në përpjekje për të shmangur dështimin përfundimtar të zgjidhjes me dy shtete.

OKB miraton plan për veprim – Izraeli dhe SHBA e quajnë “publicitet të dëmshëm”

Në fillim të shtatorit, Asambleja e Përgjithshme e OKB-së miratoi një deklaratë me shtatë pika që kërkon “hapa konkretë, të kufizuar në kohë dhe të pakthyeshëm” drejt një zgjidhjeje me dy shtete. Në të dënohej Hamas dhe kërkohej çarmatimi i tij.
SHBA dhe Izraeli e kanë quajtur deklaratën një manovër të dëmshme dhe një përpjekje për publicitet.

Ministri i Jashtëm francez, Jean-Noel Barrot, u shpreh për gazetarët:

“Deklarata e Nju Jorkut nuk është një premtim i vagullt për të ardhmen, por një plan konkret me prioritete: armëpushim, lirimi i pengjeve dhe hyrje e ndihmave humanitare në Gaza.”

Franca pritet të njohë shtetin e Palestinës – vendet e tjera ndjekin

Franca, së bashku me pesë vende të tjera, pritet të shpallë sot njohjen zyrtare të shtetit palestinez. Kjo pason lëvizje të ngjashme nga Britania, Kanadaja, Australia dhe Portugalia, që e bënë këtë të dielën.

Disa vende kanë deklaruar se njohja do të vijë me kushte, të tjera janë shprehur se procesi do të jetë gradual dhe i lidhur me reformat që pritet të ndërmarrë Autoriteti Palestinez.

Izraeli ka refuzuar të pranojë këtë veprim, duke i konsideruar premtimet e presidentit palestinez Mahmoud Abbas si të pabesueshme. Abbas nuk do të jetë fizikisht në samit, pasi SHBA nuk i dha vizë atij dhe disa zyrtarëve të tjerë palestinezë – por do të marrë pjesë virtualisht.

Netanyahu kundër një shteti palestinez – kërcënon me zgjerim të vendbanimeve

Kryeministri izraelit Benjamin Netanyahu, i cili pritet të flasë në OKB të premten, deklaroi edhe njëherë se “nuk do të ketë shtet palestinez” dhe paralajmëroi zgjerim të vendbanimeve në Bregun Perëndimor.

Ndërkohë, dy ministrat ekstremistë në qeverinë e tij, Itamar Ben-Gvir dhe Bezalel Smotrich, kanë bërë thirrje për aneksim të plotë të territoreve.

Guterres: Nuk duhet të trembemi nga hakmarrja

Sekretari i Përgjithshëm i OKB-së, Antonio Guterres, në një intervistë për AFP, deklaroi:

“Nuk duhet të kemi frikë nga hakmarrja, sepse pavarësisht çfarë bëjmë, veprimet do të vazhdojnë. Duhet të veprojmë për të ndaluar aneksimin e heshtur të Bregut Perëndimor.” Panorama