Më 16 qershor, aeroplanët luftarakë amerikanë kanë bërë përpjekje që të kapin një grup të aeroplanëve luftarakë rusë që sapo e kanë kryer një sulm ajror kundër një kampi me ushtarë. Këta të fundit luajnë rol të rëndësishëm për misionin e SHBA-së dhe Britanisë në përpjekjet e tyre për të mundur grupin terrorist, Shteti Islamik.Kampi që është goditur nga rusët, ka qenë relativisht i ri, ndërsa një gazetë britanike sapo e kishte kumtuar lajmin se forcat speciale britanike operojnë rregullisht në atë zonë.

Por ende nuk është e qartë nëse në atë kamp ka pasur ushtarë amerikanë apo britanikë gjatë kohës së sulmit. Pavarësisht kësaj, komandantët e koalicionit që udhëhiqet nga amerikanët besojnë se sulmet ajrore ruse duhej të ndalonin dhe për këtë arsye ata dërguan aeroplanë luftarakë që t’i ndalojnë rusët.

Sipas “Los Angeles Times”, aeroplanët amerikanë arritën tek ata rusë përmes një frekuence të emergjencave, për të cilat amerikanët dhe rusët janë pajtuar që të evitojnë konfliktet aksidentale apo përplasjet gjatë fluturimeve, duke iu thënë rusëve që t’i ndalojnë aktivitetet.

Por, kur aeroplanët amerikanë kthehen në bazë, bombarduesit rusë injorojnë kërcënimet amerikane dhe e vazhdojnë një seri të dytë të sulmeve ajrore në të njëjtin kamp.

Nëse kjo ngjarje të kishte ndodhur në Afganistanin e vitit 2001, në Irakun e vitit 2003 apo gjatë misioneve të NATO-s në Bosnje dhe Hercegovinë në vitin 1995 apo atë në Kosovë në vitin 1999, ky incident do të arrinte faqet e para të gazetave apo në transmetimet 24 orëshe gjatë 7 ditëve të javës për kërcënimin në rritje të luftës, në të gjitha televizionet amerikane.

Por, derisa incidenti ndodhi në vitin 2016, në qytezën Al Tanf, të shkretëtirës siriane afër kufirit me Jordaninë dhe Irakun, mediet perëndimore dhe aparati politik duket se nuk e çanë kokën shumë.

Ndoshta disa janë të hutuar nga konflikti i komplikuar dhe nuk e dinë se kujt t’i besojnë rreth temës së Sirisë. Ndoshta, dikush është pajtuar me linjën ruse, që me raste i kanë bërë jehonë edhe disa politikanë perëndimorë, se Rusia është duke e luftuar grupin militant, Shteti Islamik.

Me siguri se të gjithë janë lodhur nga lajmet rreth luftës në Lindje të Mesme.

Pentagoni në fakt, e ka trajtuar këtë çështje me Ministrinë e Mbrojtjes së Rusisë dhe mediet, duke shprehur “shqetësimin e fuqishëm rreth sulmit”.

Një zyrtar amerikan i ka thënë “Los Angeles Times” se ky ka qenë një “sulm skandaloz që duhet të sqarohet patjetër”.

Burimi anonim ka vazhduar duke thënë: “Qeveria ruse nuk ka kontroll mbi forcat e saj ose ndoshta ky ishte një veprim qëllimisht provokues. Sidoqoftë, ne jemi duke kërkuar përgjigje.”

Duket se Rusia po vazhdon të fokusohet kryekëput në ruajtjen e regjimit të presidentit sirian, Bashar al Assad, edhe nëse kjo do të kuptonte se duhet lejuar terrorizmin që të lulëzojë.

Sulmet ajrore ruse të nisura në shtatorin e vitit 2015, pothuajse në tërësi kanë qëllim që të bombardojnë grupet rebele anti-Assad, përfshirë edhe ato grupe që përkrahen nga Shtetet e Bashkuara dhe që luajnë rol të madh në largimin e IS-it nga Siria verilindore.

Në muajin maj, Rusia me të vërtetë e ka ndihmuar koalicionin pro-Assadit në rimarrjen e qytetit Palmira nga grupi militant, Shteti Islamik.

Ashtu siç e kam thënë, këto veprime kanë pasur tri qëllime, dhe që të gjitha në mbrojtje të regjimit të Assadit: konsolidimi i territorit, sigurimi i qasjes në zonat e pasura me energji në Sirinë qendrore dhe propagandimi i mitit se Rusia dhe Asadi janë kryesisht të zotuar në betejën kundër terroristëve.

Kjo ka qenë para gjashtë javësh. Siç e tregon analiza ime rreth punës së kryer nga Instituti për Studimin e Luftës, prej asaj kohe sulmet ajrore ruse janë shtuar, pothuajse në tërësi kundër civilëve apo grupeve rebele që janë trajnuar dhe armatosur nga SHBA-ja. Rusia tani sërish është duke e injoruar IS-in.

Sulmet ajrore ruse, duke luftuar rebelët e përkrahur nga perëndimi që kundërshtojnë IS-in kanë lejuar organizatën terroriste që të okupojë territore të reja.

Në një intervistë dhënë Radios Evropa e Lirë, Frederic Hof, nga Qendra Rafik Hariripër Lindje të Mesme të Këshillit Atlantik dhe ish-këshilltar special i Departamentit Amerikan të Shtetit për tranzicionin në Siri, ka thënë se “vendimi i Rusisë për të bombarduar një njësit anti-IS të trajnuar nga SHBA-ja dhe Britania, ilustron dy pika: prioritetin e ulët që Moska e ka për të luftuar IS-in; dhe mospërfillja që sot Rusia ia bën SHBA-së”

Hof vazhdon: “Assadi dhe rusët e shohin IS-in si kundërshtar ideal të Assadit: një organizatë e tmerrshme që mund të shërbejë për rikthimin e Assadit në shoqëri, pavarësisht krimeve të luftës të kryera nga regjimi… Vlerësimi i Moskës për lidershipin amerikan i jep guxim dhe e inkurajon atë që të veprojë në mënyrë të pamatur, destabilizuese dhe të rrezikshme, gjatë kohës që i ka mbetur administratës së tashme amerikane apo edhe gjatë administratës së ardhshme”.

Përgatiti: Artan Haraçija