VOAL- Kandidati i pavarur për kryetar bashkie në Berat, Pavlo Shkarpa, shpalos vizionin e tij për një Berat të ri që i ruan dhe i zhvillon traditat e tij historike, duke u përshtatur me kohën, duke përfituar nga të të gjitha risitë që ofron koha:
Kalaja e Beratit, një nga thesaret më të çmuara të trashëgimisë sonë kulturore, ka nevojë për një frymëmarrje të re. Sot, ajo përballet me mungesë të parkimit të organizuar, qarkullim të vështirë, infrastrukturë të amortizuar dhe mungesë të mirëmbajtjes së mureve historike.
Qëllimi është i qartë ta shndërrojmë këtë zonë unike në një qendër tërheqëse turistike, që ruan historinë, por njëkohësisht nxit zhvillimin lokal dhe gjallëron ekonominë e qytetit.
• Rikonstruksion i rrugëve duke ruajtur karakterin historik të zonës
• Krijimi i një parkimi të organizuar jashtë zonës së banuar për të lehtësuar qarkullimin
• Ndërtimi i një pedonaleje të re me ndriçim modern dhe gjelbërim
• Vendosja e një linje turistike me “tren elektrik” panoramik që lidh hyrjen e Kalasë me pikat kryesore
• Rivitalizimi i Kalasë përmes aktiviteteve kulturore, artizanale dhe artistike
Ky projekt do të përmirësojë ndjeshëm jetën e përditshme të komunitetit, do të rrisë numrin e vizitorëve, do të gjenerojë të ardhura të reja për ekonominë lokale dhe mbi të gjitha do të ruajë trashëgiminë historike të Beratit, krenarinë tonë të përbashkët.