Ishte viti 1986. Në radio “Tirana” u organizua një konkurs për tregimet humoristike.

Çmimin e parë e mori Filip Çakuli.

Për dhënien e çmimeve u organizua një shfaqje televizive.

Gazetari pyeti:

-Ku e gjeni humorin?

-Humori më gjen vetë. Do një fakt? Një javë më parë u organizua një takim për fushatën e korrje-shirjeve në Lushnjë.

I deleguar, shoku Pali Miska, ministër i Bujqësisë dhe anëtar i Byrosë Politike.

Shoku Pali tha tre gjëra me shumë rëndësi :

-Së pari: Gruri mbillet në tokë.

-Së dyti: Kur piqet, korret me autokombajnë.

-Së treti: Buka e grurit bëhet me miell gruri?!

Ka humor më të bukur,- tha Filipi,- duke e bërë të dridhej komplet TVSH-në…

Një ditë më vonë, në redaksinë e gazetës “Bashkimi” shoku Pali Miska, dërgoi dy sekretarë të tij. Në një dosje të kuqe mbanin një raport me 40 faqe:

-Ja, shoku kryeredaktor! Këto lexoi në seminar shoku Pali?! Jo broçkullat që thotë Filip Çakuli?! Mblidhuni. Diskutoni, dhe na dërgoni një raport…

U mblodh redaksia.

Dënimi? Edukim në Dibër? Duke qënë shef, unë e shoqërova për në Peshkopi…

Ndërsa makina “rënkonte” në të përpjetat e Qafë Buallit, më thotë Filipi:

-Mitro Xhani! Populli thotë: Një fije e ndan të mençurin nga budallai. Edhe humori qëndron në sinorin mes tragjikes dhe komikes!