Deputetja e Partisë Demokratike, Elda Hoti, në një postim në Facebook ka përkujtuar Masakrën e Qafë Valmirit, një nga ngjarjet më të rënda dhe më pak të njohura të historisë antikomuniste në Shqipëri. Ajo kujtoi se më 17 gusht 1949, regjimi komunist ekzekutoi në një ditë 14 burra nga Mirdita, si akt hakmarrjeje ndaj qëndresës së kësaj zone kundër diktaturës.

“Masakra e Qafë Valmirit është një nga aktet më makabre të diktaturës komuniste. 14 burra të pafajshëm u pushkatuan dhe u varën, si hakmarrje e verbër ndaj Mirditës antikomuniste që nuk u përkul kurrë”, shkroi Hoti.

Deputetja theksoi se krimet e komunizmit nuk duhet të harrohen, fshehen apo justifikohen, pasi harresa sipas saj përbën “armikun më të madh të lirisë”. Ajo paralajmëroi se nëse historia harrohet, ekziston rreziku që ajo të përsëritet.

Në reagimin e saj, Hoti akuzoi qeverinë aktuale si trashëgimtare të mentalitetit të sistemit komunist, duke u shprehur se “vazhdojnë të qeverisin Shqipërinë me pushtet absolut, duke përdorur dhunën ndaj qytetarëve, duke kapur drejtësinë, duke mbyllur mediat dhe duke shtypur zërat e lirë”.

Në fund, ajo shprehu nderimin e përjetshëm për martirët e Qafë Valmirit.

Postimi i plotë:

Masakra e Qafë Valmirit, një nga aktet më makabre të diktaturës komuniste, 17 gusht 1949.

14 burra të pafajshëm u pushkatuan dhe u varën, si hakmarrje e verbër ndaj Mirditës antikomuniste që nuk u përkul kurrë!
Krimet e komunizmit nuk duhen harruar, nuk duhen fshehur, nuk duhen justifikuar. Harresa është armiku më i madh i lirisë. Nëse harrojmë, rrezikojmë që historia të përsëritet.
Trashëgimtarët politikë të atij sistemi vazhdojnë të qeverisin Shqipërinë me të njëjtën mendësi të pushtetit absolut, duke përdorur dhunën ndaj qytetarëve, duke kapur drejtësinë, duke mbyllur mediat dhe duke shtypur zërat e lirë.
Nderim i përjetshëm martirëve të Qafë Valmirit!

sn