Ndërsa vera i afrohet fundit dhe freskia e parë e vjeshtës ndjehet në mëngjeset e gushtit, për shumë njerëz ky kalim i stinës nuk është vetëm meteorologjik – por emocional. Largimi nga ditët e gjata të verës dhe rifillimi i shkollës, punës apo rutinës së zakonshme po sjell me vete stres, lodhje mendore dhe një ndjesi të quajtur gjithnjë e më shpesh: “ankthi i fundverës”.

Pse largimi i verës na trishton?

Sipas specialistëve të shëndetit mendor, ndërrimi i stinëve ndikon direkt në trurin tonë. Më pak dritë natyrale sjell ulje të nivelit të serotoninës – hormon që ndikon në disponimin tonë – dhe rritje të melatoninës, që na bën të ndihemi më të përgjumur dhe më pak energjikë.

Psikologët e përshkruajnë këtë si një “mini-shok emocional”, sidomos te fëmijët dhe adoleshentët që përballen me presionin e kthimit në shkollë dhe të rriturit që ndjejnë rikthimin e përgjegjësive pas një vere më të lehtë.

“Truri ynë është i lidhur ngushtë me ritmet natyrore – më pak dritë, më pak liri, më shumë ankth. Vjeshta është bukur, por për shumëkënd është një fillim sfidues emocionalisht,” – thotë neuropsikologia amerikane dr. Kendra Phelps për Time Health.

Efekte që mund të përjetoni këtë periudhë:

Lodhje dhe përgjumje të shtuar

Rënie të motivimit

Ndjenja të nostalgjisë dhe mërzisë

Vështirësi në përqendrim

Ankth për rikthimin në rutinë (shkollë/punë)

Disa madje përjetojnë simptoma të një çrregullimi të quajtur SAD (Seasonal Affective Disorder) – një formë depresioni sezonal që shfaqet në fund të verës apo në fillim të dimrit.

Si ta menaxhojmë më mirë këtë kalim?

Ekspertët këshillojnë disa hapa të thjeshtë por efikas për të përballuar ndryshimin e stinës dhe rikthimin në rutinë pa shumë tronditje emocionale:

Filloni herët përgatitjen për shkollë/punë: Rregulloni orarin e gjumit që tani, organizoni hapësirat e punës, filloni aktivitetet me ritme të ngadalta.

Merrni dritë dielli sa më shumë të mundni: Një shëtitje e shkurtër çdo mëngjes ndihmon në përmirësimin e humorit.

Ruani rutinën fizike dhe ushqimore: Aktiviteti fizik, ushqimi i shëndetshëm dhe hidratimi janë aleatë të mirë kundër stresit sezonal.

Vendosni qëllime të reja për vjeshtën: Kjo stinë është gjithashtu një mundësi për “rinisje” — qoftë për ndonjë projekt personal, zhvillim profesional apo kohë për veten.

Kërkoni ndihmë profesionale nëse ndiheni të mbingarkuar: Psikologët dhe terapistët janë gjithmonë të gatshëm për t’ju mbështetur në këtë periudhë kalimtare.

Vjeshta: Jo fundi i lirisë, por fillimi i ritmit të ri

Edhe pse vera është sinonim i pushimit, diellit dhe lirive, vjeshta mund të sjellë qetësi, reflektim dhe qëndrueshmëri.

Ajo është një ftesë për të rimenduar prioritetet, për të ndërtuar rutinën me qëllim dhe për të rritur mirëqenien mendore përmes stabilitetit.

Përshtati: Syri.Net