Kur Donald Trump, emëroi, krushkun, Sharl Kushner, si ambasador në Paris, ky vendim i Presidentit amerikan, pati pak jehonë në mediat franceze. Nëse në Shqipëri, të gjithë e njohin Kushnerin junior, dhëndër i Trump-it dhe promotor imobiliar në ishullin e Sazanit, në Francë këto tema dhe personazhe janë pa rëndësi të madhe mediatike. Pak shkrime pati në shtypin francez mbi Sharl Kushner, ndonëse kishte dicka ofenduese dhe irrituese tek emërimi në Paris, posti diplomatik më i lakmuar në SHBA, i një të dënuari në SHBA në të kaluarën, me dy vjet burg.

Posti i ambasadorit amerikan në Paris përmban në vetëvete një ngarkesë të madhe simbolike dhe historike pasi dy nga themeluesit legjendarë të Shteteve të Bashkuara të Amerikës kanë qenë ambasadorë nē Paris si Benjamin Franklin apo Thomas Jefferson

Sharl Kushner jo vetëm që është “askushi” përballë emrave të paraardhësve të tij të kaluar, por CV-ja e tij me vepra të rënda penale është e tillë që Franca në elegancën e saj nuk e komentoi fare atë emërim nepotik të presidentit Trump.

Bomba që lëshon Kushner në Paris
Por që dje, gjërat kanë ndryshuar dhe diplomacia ashtu si mediat franceze kanë nxjerrë sot e hënë 25 gusht “artilerinë e rëndë” kundra babait të Jared Kushner. Të djelën 24 gusht, kur nuk pritej ndonjë deklaratë në një ditë pushimi, ambasadori amerikan në Paris Sharl Kushner, bën publike një letër që nuk është parë kurrë në marrëdhëniet ndërkombëtare ndërmjet aleatëve. Ai poston një “fletërrufe” kundra presidentit francez Emanuel Makron duke e denoncuar si pasiv ndaj krimeve antisemite në Francë. Biles Kushner lë të kuptojë se duke njohur shtetin palestinez , presidenti francez kryen edhe ai vetë një lloj akti antisemit. Kjo akuzë është e ngjashme me atë te Kryeministrit izraelit, sipas të cilit Makron shpërblen terroristët e Hamasit duke u angazhuar të njohë shtetin e Palestinës. Reagimi i Frances si Shtet por edhe si shoqëri civile nëpërmjet partive politike dhe medjave, ka qenë i menjëhershëm këtë të hënë 25 gusht, përballë një shfaqje të trishtë, kur një ambasador sulmon publikisht presidentin e vendit që i ka dhënë letrat kredenciale, dhe që për më tepër është vend aleat. Kurrë që nga viti 1966, kur De Gol dëboi nga Parisi selinë e NATO-s së udhëhequr nga amerikanët, nuk është parë në Francë një reagim i tillë “qëndrese” kundra fuqisë së parë në botë.

Quai d’Orsay, ministria e jashtme franceze publikon sot një komunikatë të ashpër me anë të cilës thërret për shpjegime ambasadorin amerikan në Paris, Sharl Kushner.

“Franca, shkruan Ministria e Jashtme franceze, i hedh poshtë me vendosmëri akuzat e ambasadorit amerikan në Paris, Sharl Kushner, si të papranueshme. Ato shkelin të drejtën ndërkombëtare, veçanërisht detyrimin për të mos ndërhyrë në punët e brendshme të shteteve, siç parashikohet në Konventën e Vjenës të vitit 1961. Kjo nderhyrje nuk pasqyron cilësinë e marrëdhënies transatlantike midis Francës dhe Shteteve të Bashkuara dhe besimin që duhet të rezultojë prej saj midis aleatëve”.

Shumë ministra franceze po reagojnë po aq ashpër nëpër mediat franceze. Edhe më e papritur është mbështetja që po i japin Makronit partitë politike opozitare, të cilat edhe pse nuk pushojnë së kritikuari presidentin francez, në këtë polemikë të papritur me SHBA-të po i dalin atij në krah. Ish presidenti francez, Fransua Hollande, sot deputet socialist anti-makronist, deklaron kështu se Franca nuk mund të tolerojë ndërhyrje të tilla nga ambasadorë të huaj qoftë ai i SHBA-ve, për më tepër kur bëhet fjala për akuza të rreme sikur në Francë tolerohet anti-semitizmi meqënëse kritikohet qeveria e Njetanjahut. Edhe dy partitë ekstreme në Francë, ajo e majtë e Melenshonit, dhe ajo e djathtë e Le Penit , që kanë numrin më të madh të deputetëve në parlament dhe duan të rrëzojnë presidentin Makron, nuk kanë hezituar po ashtu t’i dalin në krahë në këtë përballje me ambasadorin amerikan. Për ekstremin e majtë francez, me letrën e tij, ambasadori amerikan në Paris nuk sulmon vetëm presidentin e Francës por gjithë popullin francez. I njëjti ton dhe tek ekstremi i djathtë që deklaron se nuk është roli i ambasadorit të Shteteve të Bashkuara t’i mbajë leksione Francës.

Shtypi francez zbërthen të kaluarën e errët të krushkut të Trumpit
Gjithçka nisi nga një mesazh në X, e ish – ambasadorit të Francës, Gerad Arau kur shkruante në adresë të medjave plot ironi: “ju rekomandoj të lexoni CV-në e ambasadorit të ri amerikan në Paris. Juicy ! ” (gjithë lëng). Dhe këtë gjë s’po mungojnë të bëjnë aktualisht mediat në Francë. Nëna e Sharl Kushner, gjyshja e Jared-it), ishte një hebre kurajoze që arriti të arratisej nga kampet e vdekjes në Poloni nëpërmjet një tyneli të nëndheshëm. Në atë aksion ku shpetoi jetën ajo u njoh dhe me burrin e saj të ardhshëm me të cilin instalohet në SHBA në Nju Xhersey. Së bashku patën tre fëmijë, dy djem, ndër të cilët ambasadori aktual në Paris Sharl Kushner, dhe një vajzë.

Familja pati sukses në sipërmarrje imobiliare dhe u arrit një nivel i lartë pasurie (e llogaritur në 7 miliardë dollarë sot) që bëri që të ndihmonte shumë komunitetin hebre të Nju Xhersit. Por midis fëmijve që vazhduan biznesin familjar nëpërmjet Sharlit filluan mosmarrëveshjet. Vëllai i tij e denoncoi për fshehje fitimesh dhe mos pagim taksash. E motra së bashku me të shoqin po ashtu bënë një dëshmi të njëjtë kundra Sharl Kushnerit. Ky i fundit për t’i mbyllur gojën kunatit, i çon një prostitutë dhe e filmon fshehurazi për shantazh dhe ja jep filmin të motrës.

Kjo i hodhi edhe më shumë “benzinë” sherrit familjar. Si përfundim, Sharl Kushner u njoh nga drejtësia amerikane si fajtor për evazion fiskal, për financim politik ilegal (të partisë demokrate) dhe per shantazh mbi deshmitaret, dhe si pasojë u dënua me dy vjet burg më 2005. Sipas prokurorit te Nju Xhersit të asaj kohe, kjo ishte dosja më e pisët në nivelin familjar që ai kish trajtuar ndonjëherë në karrierën e tij. Vetë Sharl Kushner në një intervistë vazhdonte dhe më vonë t’u mbante inat të përjetshëm vëllait dhe motrës që e çuan në burg duke u shprehur keshtu:

“Unë besoj se Zoti dhe prindërit e mi në qiell e falin gabimin tim. Por nuk mendoj se ata do ta falin ndonjëherë vëllain dhe motrën time për nisjen e një hetimi penal që më çoi në burg nga xhelozia, urrejtja dhe keqdashjë”. Për fatin e Sharl Kushnerit, krushku i tij Donald Trump u zgjodh president më 2016, dhe në fund të mandatit të tij të parë, Donald Trump e amnistoi vjehrrin e të bijës për dënimin penal dhe dy vitet e burgut që kishte bërë.

Kjo amnisti i hapte rrugën emërimit të tij si ambasador në Paris që ndodhi që në fillim të këtij mandati të dytë të Donald Trumpit. Parisi që nuk tha gjë në atë moment me gjithë këtë CV të veçantë të Sharl Kushnerit, është i detyruar sot të reagojë në mbrojtje të Presidentit francez i akuzuar si tolerant me antisemitizmin nga ambasadori i Trumpit dhe njëkohësisht krushku i tij.

Një polemikë pak a shumë e ngjashme, në Gjermani, me ish – ambasadorin amerikan të mandatit të parë të Trump, një farë Richard Grenell… Ky i fundit i jepte urdhër asaj kohe qeverisë gjermane të mos vinte në funksionim gazsjellësin në ndërtim e sipër North Stream 2, me argumentin se kjo nuk ishte në interes të Ukrainës. Klasa politike gjermane kërkoi asaj kohe që Grenell të dëbohej nga Gjermania si “non grata”, një ekstremitet në të cilin nuk ka rënë, ende, klasa politike franceze me Sharl Kushnerin.