Në deklaratën e SPAK-ut pas arrestimit të kryebashkiakut të Tiranës, Erion Veliaj, tërhoqi vëmendje mes të tjerave edhe përfshirja në këtë çështje e deputetes socialiste Klotilda Bushka, kryetare e Komisionit të Ligjeve.

Ajo është vënë nën hetim me dyshimet se ka qenë e përfshirë në veprime aktive në një fushatë për frikësimin e dëshmitarëve, helmimin e provave dhe pengimin e hetimit në dhjetor të vitit të kaluar dhe në janar të këtij viti.

Në dosjen qindrafaqëshe të GJKKO-së, Bushka thuhet se ka ndërhyrë për të penguar hetimet e SPAK-ut, duke intimiduar dëshmitarë dhe duke u marrë telefonat që të mos i dorëzonin në SPAK.

Dhe për të kuptuar pozicionin e saj në këtë çështje, “Ora News” ka siguruar pamje ku Klotilda Bushka shfaqet në zyrën e Ajola Xoxës, që ashtu siç u vu në rresht administrata e Bashkisë së Tiranës në shesh, ashtu thuhet se edhe ajo e mblidhte Gjyqësorin në katin e 10-të të “Sky Tower”.

Nga pamjet e siguruara nga “Ora News” vërehet qartë se në zyrën e Xoxës gjenden Aulona Hazbiu, që është konsulente ligjore së bashku me Klotilda Bushkën.

Burimet thonë se Hazbiu përveçse për konsulencë, ajo “përdoret” edhe për të përkthyer Kushtetutën, sikurse ka bërë në kohën e reformës në drejtësi, kur ajo shërbente si Këshilltare në procesin e reformës në drejtësi.

Kujtojmë se kjo zyrë është edhe e para ku zbarkuan BKH-ja dhe SPAK-u dhjetorin e vitit të kaluar dhe është lehtësisht e verifikueshme sa i përket vërtetësisë së pamjeve të publikuara.

Ndërkaq burime për “Ora News” nga ish-stafi i bashkëshortes së kryebashkiakut të arrestuar dhe nën hetim për pastrim parash dhe fshehje pasurie, Erion Veliaj bëjnë me dije fakte tronditëse se në zyrën e Ajola Xoxës janë hequr prokurorë dhe gjyqtarë nga sistemi, ku dhe po ashtu, janë emëruar prokurorë dhe gjyqtarë të tjerë që kanë lënë çanta me lekë për futjen apo qëndrimin e tyre në sistemin e drejtësisë.

Skandali shkon dhe më larg. Sipas burimeve në fjalë, në këtë zyrë, ku disa herë e pranishme ka qenë edhe vetë Bushka janë paraqitur prokurorë dhe gjyqtarë, të cilët kanë kërkuar kalimin e procesit të shumanatemuar të Vetting-ut.

Por se cili ka qenë roli konkret i Bushkës në këto procese ku vetë Bushka duket se është në konflikt interesi si përfaqësuese e pushtetit legjislativ në raport me pushtetin gjyqësor mbetet për t’u parë nga hetimet e mëtejshme të SPAK-ut, nëse do të ketë edhe në këtë aspekt.

E nga ana tjetër, mësohet se në këtë zyrë “paraqisnin forcën” edhe prokurorë dhe gjyqtarë që kishin probleme me institucionet e Apelimit apo Verifikimit dhe kishin nevojë për konsulencë më profesionale dhe më të thelluar në sistemin e drejtësisë së reformuar nga Fatmir Xhafaj, i cili së fundmi ka propozuar edhe ngritjen e një komisioni “special” parlamentar për të kontrolluar organet e pavarura të drejtësisë.

Në fakt kjo nismë tashmë ka nisur të komentohet në media se vjen nga paniku se sistemi që ata ngritën po i del jashtë kontrollit dhe viktima të tij mund të jenë pikërisht ata që e hartuan, votuan dhe ngritën struktura të pavarura si SPAK dhe GJKKO.

Bëhet fjalë për takimet që zhvilloheshin jo pak herë në ambientet e zyrës së konsulencës ligjore “Partneres”, që administrohej nga Ajola Xoxa, në të cilën Klotilda Bushka ndihej si në shtëpinë e saj.

Në fakt vetë ligjvënësja socialiste nuk e ka mohuar lidhjen e fortë me Xoxën, por për hetuesit e dosjes “Veliaj”, ajo është përfshirë në operacione të mirëfillta kriminale për shkatërrimin e provave hetimore, apo edhe intimidimin e dëshmitarëve të procesit të thirrur nga SPAK-u.

Vetëm 4 ditë nga arrestimi i Veliajt Deputetja e Partisë Socialiste, Klotilda Bushka u shfaq aktive në takimet e saj të influencës së dyshuar për prishjen e provave për dosjen e Erion Veliaj dhe Ajola Xoxës.

Megjithatë kjo duket se nuk e ka shqetësuar Bushkën pasi është fotografuar sërish së bashku me avokatin e Ajola Xoxës, Ermir Beta.

Fotoja më poshtë është bërë të premten e 14 shkurtit në qendër të Tiranës, dy ditë pasi u dha vendimi nga GJKKO-ja për lënien në fuqi të masës së arrestit për Erion Veliajn, i cili mbrëmjen e së mërkurës do të transportohej në paraburgimin e Durrësit.

Goxhaj deklaron se Ajola Xoxa i kishte sjellë një telefon të ri të markës Iphone 12 dhe i ka thënë se telefonin e saj Samsung A35 do ta asgjësonin. Prokuroria e Posaçme po e heton kryetaren e Komisionit të Ligjeve, Klotilda Bushka për kryerjen e veprimeve me qëllim pengimin e zbulimit të së vërtetës teksa ajo i mohoi këto akuza. Mesa duket Bushka vijon koordinimin për çështjen Veliaj./ Ora News