Ish-trajneri i Real Madridit, Carlo Ancelotti, është dënuar me një vit burg për evazion fiskal të lidhur me vitin tatimor 2014, ndërsa është shpallur i pafajshëm për një akuzë të ngjashme që kishte të bënte me vitin 2015.

Sipas burimeve ligjore, gjykata e Madridit e dënoi gjithashtu Ancelottin, për mashtrimin e vitit 2014, me një gjobë prej 386.361,93 eurosh, si dhe me ndalim për të përfituar ndihma apo subvencione publike, dhe për të gëzuar lehtësime tatimore apo përfitime sociale për një periudhë trevjeçare.

Megjithëse u shpall i pafajshëm për akuzën e mashtrimit me të ardhurat personale për vitin 2015, gjykata vendosi që përgjegjësia civile që rrjedh nga dënimi i vitit 2014 t’i caktohet Drejtorisë së Përgjithshme të Tatimeve, në vlerën prej 386.361,93 eurosh.

Prokuroria e kishte akuzuar Ancelottin për mashtrim ndaj arkës shtetërore në shumën totale prej 1.062.079 eurosh, të ndarë në 386.361 euro për vitin 2014 dhe 675.718 euro për vitin 2015, gjatë mandatit të tij të parë si trajner i Real Madridit.

Gjatë gjyqit, që u zhvillua më 2 dhe 3 prill në Gjykatën e Madridit, Ancelotti deklaroi se nuk kishte kurrë qëllim të mashtronte autoritetet tatimore dhe se kishte vepruar bazuar në udhëzimet e klubit dhe këshilltarëve të tij. Syri.net-Protothema