Gazetarja Anduena Llabani, ka komentuar zhvillimet e fundit lidhur me marrjen të pandehur të zëvendëskryeministres Belinda Balluku nga SPAK, duke zbuluar detaje mbi dinamikën e hetimeve dhe përfshirjen e ndërkombëtarëve në këtë proces.

Sipas Llabanit, hetimi ndaj Ballukut është zgjeruar ndjeshëm javët e fundit, ndërsa numri i prokurorëve që po punojnë për rastin është rritur, pasi po merren me dosje tw ndryshme.

“Prokurorët për çështjet ndaj Ballukut janë shtuar në numër. Po merren me dosje të ndryshme, por edhe Byroja Kombëtare e Hetimit (BKH) ka një numër të konsiderueshëm agjentësh që po punojnë për rastet në fjalë,” u shpreh ajo në News 24.

Moderatorja shtoi se prokurori Dritan Prençi, i cili drejton hetimet për disa nga dosjet që lidhen me Ballukun, është takuar së fundmi nga një zyrtar i lartë i qeverisë amerikane, fakt që sipas saj tregon interesin e ndërkombëtarëve për këtë çështje.

“Në SPAK, prokurorin Prençi e ka takuar një zyrtar i lartë i qeverisë amerikane. Nëse ndërkombëtarët, me hir apo pahir, kanë kërkuar një hetim efikas, kjo tregon se edhe ata kanë interesin e tyre në këtë rast. Kur bëhet fjalë për korrupsion në nivelet e larta, ky është një nga hetimet që mund t’i japë kuptim SPAK-ut dhe vlerë asaj heshtjes kaqvjeçare të institucionit,” tha Llabani.

Një element tjetër i rëndësishëm që, sipas Llabanit, ka ndihmuar ndjeshëm hetimet, është puna mediatike e bërë nga News24.

“Një ndihmë shumë e madhe kanë qenë edhe materialet dhe raportimet e News24. Në dosje evidentohet se një pjesë e mirë e dokumenteve mbi të cilat është bazuar hetimi, përfshirë edhe atë për tunelin e Llogarasë, janë marrë nga raportimet e këtij televizioni. Hetimi ka marrë spunto pikërisht nga faktet e publikuara në News24,” u shpreh ajo.