Federata e Futbollit e Kosovës (FFK) ka bërë të ditur të hënën se ka reaguar zyrtarisht në Federatën Evropiane të Futbollit (UEFA) për siç ka thënë shfaqjen e flamujve, slogoneve dhe thirrjeve të tifozëve serbë me “mesazhe politike, shoviniste dhe raciste kundër Kosovës”, gjatë ndeshjes Serbi-Angli, në kuadër të Kampionatit Evropian të Futbollit, EURO 2024.

“Shfaqja e papenguar e mesazheve dhe thirrjeve të tilla në një event madhështor si EURO 2024 është e pakuptimtë dhe absurde. Përmes thirrjeve të tilla dëshmohet urrejtja e mbjellë në opinionin publik në Serbi ndaj fqinjve të saj”, është thënë në komunikatë.

FFK-ja ka kërkuar që ndaj Federatës së Futbollit të Serbisë, të merren masa të ashpra disiplinore.

“Thirrjet kundër shtetit të Kosovës në një event madhor si Euro 2024 janë motivim për grupet nacionaliste dhe kërcënojnë sigurinë, edhe ashtu të brishtë të rajonit”, është thënë mes tjerash në deklaratë.

Mediat lokale në Kosovë kanë raportuar që përgjatë ndeshjes Serbi-Angli janë dëgjuar thirrjet si “Kosova është Serbi” dhe që para ndeshjes është djegur flamuri i Shqipërisë.

Ky është edicioni i 17-të i Kampionatit Evropian, i njohur më mirë si EURO, dhe në të po merr pjesë edhe Shqipëria – për herë të dytë në historinë e vet, pas debutimit më 2016.

Ndeshjet do të zhvillohen në 10 stadiume në 10 qytete të ndryshme të Gjermanisë nga 14 qershori deri më 14 korrik.

Serbia nuk e njeh pavarësinë e Kosovës dhe angazhohet vazhdimisht në fushata lobuese kundër Kosovës.

Dy vendet dialogojnë në Bruksel, për normalizim të marrëdhënieve, qysh prej vitit 2011.

Palët kanë nënshkruar një mori marrëveshjesh, por jo të gjitha janë zbatuar.REL

Ndeshja e Kampionatit Evropian ndërmjet Shqipërisë dhe Italisë mbrëmjen e së shtunës u drejtua nga arbitri gjerman Felix Zwayer. Për një ish-arbitër, ky ishte një “turp i rëndë”

Nga Felix Rasen, FOCUS

Mbrëmjen e së shtunës, një arbitër gjerman ishte në aksion në Kampionatin Evropian për herë të parë.

Felix Zwayer (43) dhe ndihmësit e tij Stefan Lupp (45) dhe Marco Achmüller (44) drejtuan ndeshjen ndërmjet kombëtares italiane dhe Shqipërisë (2:1).

Por për një person, emërimi i Zwayer-it në Kampionatin Evropian është absolutisht absurditet: ish-arbitri Manuel Gräfe.

50-vjeçari sulmoi ashpër arbitrin në X të dielën në mëngjes – dhe për një arsye shumë specifike.

Gräfe po aludonte për rolin e Zwayer-it në skandalin Hoyzer në vitin 2005, ku ai ishte vijërojtës për një kohë të gjatë.

Në atë kohë, Zwayer pranoi para nga Hoyzer dhe nuk raportoi për trukime ndeshjesh prej tij. Për këtë ai u ndalua për gjashtë muaj.

Për Gräfe, fakti që 43-vjeçari lejohet të marrë bilbilin në Kampionatin Evropian në vendin e tij është “turpi më i madh në historinë e lavdishme të gjyqtarëve gjermanë gjatë dekadave të fundit”.

“Përshtatet me këto kohë të çuditshme kur lidhjet janë shumë më të rëndësishme se vlerat dhe performanca (ai është mesatar në rastin më të mirë).”

Sipas Gräfe, gjyqtarë të tjerë do të kishin merituar më shumë për të arbitruar një lojë në një turne kaq të madh.

Berlinezi ka reaguar disa herë kundër Zëayer-it, më së fundi në ndeshjen më të mirë midis Bayer Leverkusen dhe FC Bayern në Bundesligë. Sipas Gräfe, një gjyqtar i dënuar nuk duhet të lejohet më të drejtojë lojëra të tilla. sn

Kapiteni i Kombëtares, Berat Gjimshiti, foli pas duelit ndaj Italisë, ku kuqezinjtë u mposhtën me rezultatin 2-1. Në prononcimin e dhënë për mikrofonin e “TV Klan”, Gjimshiti ndër të tjera deklaroi:

“Performanca ishte OK, por nuk ishte aq e mirë, sa e kemi dashur dhe përgatitur. Ka gjëra për të përmirësuar. I kemi lënë shumë hapësira Italisë, mbërrinin shumë thjeshtë në zonën tonë. Nuk kemi shumë kohë, pas 4 ditësh luajmë kundër Kroacisë. Duhet të bëjmë ndeshje të mirë dhe t’i marrim pikë.

Momenti më i vështirë ishte kur pësuam gol. Gjëja më pozitive e kësaj nate ishte që mbëtëm në lojë deri në fund, me pak fat mund edhe të barazonim. Duhet eksperiencë dhe punë. Nuk është e thjeshtë, kundër kombëtareve të mëdhaja që kanë kualitet, duhet të përballosh presionin dhe t’i bësh dëm kundërshtarit, sepse kështu ishte e thjeshtë për ata.

Nuk punuam keq në mbrojtje, mungonin shumë faullat, të ndërprisnim rritmin e kundërshtarit. Kishim rritëm dhe vetbesim. Ajo është gjëra që duhet përmirësuar.

Skuadra zbriti shumë poshtë, duhet të qëndrojmë më lartë dhe të bëjmë presion te kundërshtari. Këto gjëra duhet të përmirësohen sa më shpejt. Sot janë mundësitë për video dhe për analiza.

Tifozeria më e bukur në botë, nuk ka shumë fjalë, dua t’i falenderoj për mbështetjen sot, një atmosferë fantastike. Shpresoj që do të jemi edhe në 2 ndeshjet e radhës dhe pse jo t’i befasojmë të gjithë”, u shpreh Gjimshiti.  sn

Nedim Bajrami është futur në historinë e Kampionateve Evropiane. Mesfushori i Kombëtares ka arritur të shënojë gol vetëm pas 23 sekondave lojë kundër Italisë.

Fantazisti mori topin nga një gjuajtje e dobët e Federico Dimarco para se të gjuante topin pas shpinës së kapitenit italian Gianluigi Donnarumma. Goli i tij kapërceu rekordin e mëparshëm, të mbajtur nga rusi Dmitri Kirichenko kundër Greqisë në 2004

Goli i tij për Rusinë kundër fituesve eventualë të turneut erdhi vetëm 65 sekonda pas lojës, duke kaluar pas portierit grek Antonios Nikopolidis.

Golat më të shpejtë në historinë e kampionateve evropiane

00:23 – Nedim Bajrami ( Shqipëria vs Italia më 15 Qershor 2024 )

01:05 – Dmitri Kirichenko ( Rusia vs Greqia më 20 qershor 2004 )

01:22 – Emil Forsberg ( Suedia vs Polonia më 23 qershor 2021 ) Yusuf

: Poulsen (Danimarka vs Belgjikë më 17 qershor 2021)

01:40 – Robert Lewandowski (Polonia vs Portugalia më 30 qershor 2016)

01:57 – Luke Shaw (Anglia vs Italia më 11 korrik 2021 )

01:58 – Robbie Brady (Republika) vs Franca më 26 qershor 2016)

02:08 – Sergei Aleinikov (BRSS vs Anglia më 18 qershor 1988)

02:14 – Alan Shearer (Angli vs Gjermani më 26 qershor 1996)

02:14 – Petr Jirácek (Republika Çeke kundër Greqisë 12 qershor 2012) sn

Shqipëria është mposhtur 2:1 nga kampionia në fuqi Italia në ndeshjen e saj të parë në Grupin B në Kampionatin Evropian 2024, të shtunën mbrëma në Dortmund të Gjermanisë.

Dy herë kampionia evropiane fitoi me përmbysje përballë kuqezinjve, falë dy golave të shpejtë nga Alessandro Bastoni dhe Nicolo Barella, pasi Nedim Bajrami e kishte kaluar Shqipërinë në epërsi pak çaste pasi nisi ndeshja në stadiumin Signal Iduna Park.

Italia tani ka tri pikë, aq sa ka Spanja, e cila e mundi 3:0 Kroacinë në ndeshjet tjetër të këtij grupi, që u zhvillua të shtunën më herët.

Shqipëria dhe Kroacia janë pa pikë dhe ato do të përballen të mërkurën më 19 qershor.

Italia, e cila do të takohet me Spanjën në ndeshjen e radhës, e mbizotëroi Shqipërinë me lojë dhe krijoi më shumë raste shënimi, por nuk qe në gjendje t’i shfrytëzojë mundësitë e shumta.

Bjarami shënoi vetëm 23 sekonda pasi nisi ndeshja, pasi shfrytëzoi një top të kthyer gabimisht në zonë nga Federico Di Marco, duke e thyer rekordin për golin më të shpejtë në historinë e këtij turneu.

Por, Italia u përgjigj duke e barazuar rezultatin në minutën e 11-të përmes Bastonit, i cili shënoi me kokë nga afërsia pasi u harrua i vetëm në shtyllën e dytë, dhe kaloi në epërsi kur Barella realizoi gol të mrekullueshëm me një goditje nga largësia pesë minuta më vonë.

Kjo është hera e dytë që Shqipëria merr pjesë në Kampionatin Evropian, pas debutimit në EURO 2016, para 10 vjetëve në Francë. REL

Kampionati Evropian i futbollit 2024 filloi të premten mbrëma, me nikoqiren Gjermaninë që e mposhti bindshëm 5:1 Skocinë në ndeshjen hapëse të Grupit A në stadiumin Allianz Arena në Munih.

Florian Wirtz, Jamal Musiala, Kai Havertz, Niclas Fullkrug dhe Emre Can i shënuan golat për Gjermaninë, kundër një skuadre skoceze që luajti me 10 futbollistë për pjesën më të madhe të ndeshjes, pasi Ryan Porteous u përjashtua nga loja me karton të kuq në fund të pjesës së parë.

Mbrojtësi gjerman Antonie Rudiger shënoi autogol në fund të ndeshjes për golin ngushëllues të skocezëve. Gjermania do të përballet me Hungarinë në ndeshjen e dytë në grup, ndërsa Skocia me Zvicrën. Hungaria dhe Zvicra përballen paraprakisht të shtunën, më 15 qershor.

Ky është edicioni i 17-të i Kampionatit Evropian, i njohur më mirë si EURO, dhe në të po merr pjesë edhe Shqipëria – për herë të dytë në historinë e vet, pas debutimit më 2016.

Ndeshjes hapëse mes gjermanëve dhe skocezëve i parapriu ceremonia e zakonshme zyrtare.

Kosova dështoi të kualifikohej, ndërsa Shqipëria do ta ketë një grup zor ta kalueshëm, pasi përballet me Italinë, Spanjën dhe Kroacinë.

Turneu ka gjashtë grupe me nga katër ekipe secili. Ekipet në secilin grup përballen njëra me tjetrën nga një herë. Dy ekipet me më së shumti pikë në grup kalojnë në fazën tjetër të garës, së bashku me katër ekipe që kanë paraqitje më të mira nga vendet e treta.

Ndeshjet do të zhvillohen në 10 stadiume në qytete të ndryshme të Gjermanisë nga 14 qershori deri më 14 korrik.

Nga rrethi i 16 më të mirëve e tuje, gara është e karakterit të eliminimit direkt në fazat çerekfinale, gjysmëfinale dhe finale për ta përcaktuar kampionin.

Anglia dhe Franca shihen si kombëtaret favorite për ta fituar trofeun evropianin. Anglia nuk ka fituar trofe të madh ndërkombëtar prej se e fitoi Kupën e Botës më 1966 dhe doli humbëse në EURO-n e kaluar kur u mposht nga Italia.

Franca ishte finaliste e Kupës së Botës 2022, ku u mposht nga Argjentina e Lionel Messit, dhe udhëhiqet nga superylli i ri i Real Madridit, Kylian Mbappe.

Cilat janë grupet?

Grupi A: Gjermani, Skocia, Hungaria, Zvicra

Grupi B: Spanja, Kroacia, Italia, Shqipëria

Grupi C: Sllovenia, Danimarka, Serbia, Anglia

Grupi D: Polonia, Holanda, Austria, Franca

Grupi E: Belgjika, Sllovakia, Rumania, Ukraina

Grupi F: Turqia, Gjeorgjia, Portugalia, Republika e Çekisë

Kush janë kampionët e kaluar?

Italia e fitoi edicionin e fundit të EURO-s, i cili u zhvillua më 2021 për shkak se turneu u shty për një vit si pasojë e pandemisë së COVID-19.

Gjermania dhe Spanja e kanë fituar Kampionatin Evropian nga tri herë secila.

Ndërsa, dy kombëtaret e tjera të vetme që e kanë fituar më shumë se një herë, janë Italia dhe Franca, që e kanë fituar nga dy herë secila.

Një turne më ndryshe

Megjithatë, ky turne do të zhvillohet në një kontekst politik më ndryshe. Ngjarja kryesore sportive në Evropë prej se Rusia e nisi pushtimin e Ukrainës po mbahen nën hijen e konfliktit më shkatërrues në Evropë që nga Lufta e Dytë Botërore.

Ukraina është pjesëmarrëse dhe mund të presë pritje të ngrohtë në Gjermani, e cila ishte nikoqire e ndeshjeve të kombëtares ukrainase si vendëse gjatë fushatës kualifikuese.

Rusia u përjashtua nga kualifikimet dhe është e pezulluar nga të gjitha garat ndërkombëtare nga organi i futbollit qeverisës në Evropë, UEFA, si dhe nga shtëpia e futbollit botëror, FIFA.

Ndërkohë, Gjeorgjia po shkon në kampionatin e parë të madh të futbollit në një kohë kur kriza në atdhe është thelluar.

Si gjithmonë, Kampionati Evropian është i kërcënuar nga huliganizmi, ku përleshjet mes tifozëve rivalë janë bërë ndodhi e zakonshme. Por, kërcënimi nga terrorizmi dhe dhuna politike janë bërë shqetësim edhe më i madh për sigurinë, pas një sërë sulmesh ndaj politikanëve në Gjermani.

Autoritetet gjermane kanë vendosur t’i rrisin dhe shpeshtojnë kontrollet kufitare gjatë turneut të futbollit. Më shumë se 20.000 oficerë të policisë do të jenë në detyrë.

Duke i parë tensionet rreth luftës në Rripin e Gazës, UEFA dhe Gjermania i shmangën shqetësime më të mëdha kur Izraeli dështoi të kualifikohej për EURO 2024.