GJUMI- Poezi nga Jorgos SEFERIS- Përktheu VASILIKA IFANDI

October 25, 2026

(Kujtojmë. se sot, më 24 tetor 1963,

Akademia Suedeze shpalli

dhënien e Çmimit Nobel për Letërsi për poetin grek Jorgo SEFERIS)

.

Gjumi të mbështolli si një pemë,

me gjethe të gjelbra,

frymoje si një pemë,

në dritën e qetë,

në burimin e tejdukshëm

vështrova fytyrën tënde,

qepalla të mbyllura

dhe qerpikët vizatonin mbi ujë.

Gishtat e mi, në barin e butë,

gjetën gishtat e tu.

Ta mbajta pulsin për një çast

dhe diku tjetër ndjeva

dhimbjen e zemrës sate.

Poshtë rrepeve,

pranë ujit, mes dafinave,

gjumi

të zhvendoste dhe të copëtonte

rreth e, pranë meje,

pa mundur

të të prekja të gjithën,

të bashkuar me heshtjen tënde,

duke parë hijen tënde

të zmadhohej e të zvogëlohej,

të humbiste mes hijeve të tjera,

brenda botës tjetër

që të linte të lirë e të mbante.

Jetën që na dhanë për ta jetuar,

e jetuam.

Ki mëshirë për ata që presin

me kaq durim,

të humbur mes dafinave të zeza,

nën rrepet e rëndë,

dhe për ata që flasin të vetmuar

në hone e puse,

dhe mbyten

brenda rrathëve të zërit të tyre.

Ki mëshirë për shokun që ndau

me ne privimin dhe djersën,

dhe u zhyt brenda diellit

si një korb, përtej mermerëve,

pa shpresë për të gëzuar shpërblimin tonë.

Na jep, jashtë gjumit,

qetësinë.

Fjalë kyçe: 24 tetor 1963, Jorgos Seferis, Nobel Letersi, Vasilika Ifandi'