Forcës së Sigurisë së Kosovës i janë shtuar 515 ushtarë të rinj, të cilët u betuan në kazermën “Adem Jashari”. Në ceremoninë e organizuar për këtë rast, kryeministri Albin Kurti deklaroi se qeveria synon të investojë mbi 1 miliard euro në ushtri gjatë mandatit aktual.

Sipas Kurtit, kjo është gjenerata më e madhe e rekrutëve në historinë e FSK-së. Ai e përshkroi zgjerimin e radhëve të saj si “515 pushkë më shumë për sigurinë e vendit” dhe si një garanci shtesë për mbrojtjen e lirisë dhe paqes.

Kryeministri tha se forcimi i kapaciteteve mbrojtëse mbetet ndër angazhimet kryesore të qeverisë, duke e lidhur atë me ruajtjen e sovranitetit, integritetit territorial dhe sigurisë së qytetarëve.

Duke paraqitur bilancin e investimeve, Kurti deklaroi se buxheti i ushtrisë u trefishua gjatë mandatit të kaluar, ndërsa blerjet e armatimit kanë kaluar vlerën e 430 milionë eurove. Ai përmendi dronët Bayraktar dhe Skyguard, si dhe mbi 40 lloje armatimi të rëndë e të lehtë, që sipas tij përmbushin standardet e NATO-s.

Kurti bëri të ditur gjithashtu se janë rekrutuar 3220 ushtarë të rinj, duke e çuar numrin e pjesëtarëve të forcës në më shumë se dyfishin. Një tjetër gjeneratë pritet të nisë trajnimin brenda këtij viti.

Sipas tij, ky ritëm po mundëson arritjen dy vjet më herët të kapaciteteve ushtarake të planifikuara për vitin 2028.

“Synimi ynë është i qartë: t’i dalim zot atdheut e ushtria jonë të bëhet pjesë e NATO-s”, u shpreh Kurti.

Në fjalën drejtuar ushtarëve të rinj, ai kujtoi sakrificën e brezave për lirinë e Kosovës dhe theksoi përgjegjësinë që ata marrin për mbrojtjen e vendit. bw