Ish-kryeministri francez Gabriel Attal njoftoi sot se do të kandidojë për president në zgjedhjet e vitit të ardhshëm, kur përfundon mandati i Emmanuel Macronit.

“Nuk mund ta duroj më këtë lloj politike franceze, ku gjithçka reduktohet në menaxhimin e rënies”, deklaroi 37-vjeçari, i cili në vitin 2024 u bë kryeministri më i ri në historinë e Francës.

Attal shpalli kandidaturën e tij në fshatin jugor Mur-de-Barrez, një zonë rurale ku forcat centriste synojnë të forcojnë mbështetjen përballë rritjes së së djathtës ekstreme.

Ai i bashkohet një gare tashmë të mbushur me kandidatë, ku përfshihen ish-kryeministri i qendrës së djathtë Edouard Philippe dhe lideri i së majtës radikale Jean-Luc Melenchon.

Ndërkohë, National Rally (RN) shpreson të fitojë pushtetin për herë të parë, me kandidaturën e mundshme të Marine Le Pen ose të Jordan Bardella.

Karriera politike e Attal ka qenë e shpejtë dhe shpesh është krahasuar me atë të Macronit.

Ai hyri në parlament në vitin 2017, më pas shërbeu si zëdhënës i qeverisë dhe ministër i Buxhetit, përpara se të bëhej kryeministër në moshën 34-vjeçare.

Si ministër i Arsimit në vitet 2023-2024, ai ndërmori masa kundër bullizmit në shkolla dhe ndaloi veshjen e abajasë, një veshje e gjatë e përdorur nga disa gra myslimane, në institucionet arsimore publike.

Në një lëvizje që u interpretua si pjesë e përgatitjeve për kandidaturën presidenciale, Gabriel Attal foli hapur për jetën e tij private në një libër të botuar muajin e kaluar, ku i kushtoi një kapitull partnerit të tij, Stephane Sejourne.

Attal u distancua nga Macron pasi presidenti shpërndau Asamblenë Kombëtare në vitin 2024 dhe thirri zgjedhje të parakohshme, një vendim që solli bllokim politik dhe i dha RN-së statusin e partisë më të madhe në parlament.

Sondazhet sugjerojnë se Edouard Philippe mbetet kandidati centrist me shanset më të mëdha për të fituar në një balotazh kundër së djathtës ekstreme, çka e bën garën brenda kampit qendror veçanërisht të fortë. bw