Tensionet politike në SHBA janë rritur ndjeshëm, pasi disa ligjvënës demokratë kanë kërkuar shkarkimin e presidentit Donald Trump duke u mbështetur në Amendamentin e 25-të të Kushtetutës, pas kërcënimeve të fundit për sulme ndaj objektivave civilë në Iran.

Amendamenti i 25-të parashikon transferimin e pushtetit në rast se presidenti konsiderohet i paaftë për të ushtruar detyrën.

Deputetja nga Arizona, Yassamin Ansari, është ndër zërat më të fundit që ka kërkuar aktivizimin e këtij mekanizmi. Në një reagim në rrjetin social X, ajo akuzoi Trump se “po përshkallëzon një luftë shkatërruese dhe të paligjshme, duke kërcënuar me krime masive lufte dhe duke synuar infrastrukturë civile në Iran”, duke shtuar se retorika e tij “ka kaluar çdo kufi” në 48 orët e fundit.

Ansari paralajmëroi gjithashtu se do të kërkojë hetim dhe ndjekje edhe për Pete Hegseth lidhur me mënyrën e menaxhimit të operacioneve amerikane në Iran, duke e akuzuar për shkelje të betimit dhe rrezikim të trupave.

Edhe deputetja nga Minesota, Ilhan Omar, reagoi ashpër ndaj deklaratave të Trump, duke thënë: “Kjo nuk është në rregull. Aktivizoni Amendamentin e 25-të. Shkarkim. Largim. Ky i çmendur i pakontrolluar duhet të hiqet nga detyra.”

Në të njëjtën linjë u shpreh edhe deputetja nga Nju Meksiko, Melanie Stansbury, e cila theksoi se “është koha që Kongresi dhe kabineti të veprojnë”.

Ndërkohë, ish-kongresmeni republikan nga Ilinoi, Joe Walsh, deklaroi se Trump “do të mbetet përgjithmonë një njollë për këtë vend dhe botën”, duke kërkuar gjithashtu zbatimin e menjëhershëm të Amendamentit të 25-të.

Edhe senatori demokrat, Chris Murphy, shkroi se nëse do të ishte pjesë e kabinetit të Trump, do të konsultohej urgjentisht me ekspertë kushtetues për këtë çështje, duke e cilësuar situatën “plotësisht jashtë kontrollit”.

Megjithatë, procedura për largimin e presidentit përmes Amendamentit të 25-të është shumë e ndërlikuar. Ajo kërkon iniciativën e zëvendëspresidentit JD Vance, i cili së bashku me shumicën e kabinetit duhet t’i dërgojnë një deklaratë me shkrim Kongresit, ku presidenti shpallet i paaftë për detyrën.

Presidenti ka të drejtë ta kundërshtojë këtë vendim dhe, nëse procesi vijon, çështja i kalon Kongresit, i cili duhet të vendosë brenda 21 ditësh me një shumicë prej dy të tretash në të dyja dhomat, një skenar që konsiderohet pothuajse i pamundur me balancat aktuale politike. Panorama