Presidenti i SHBA-së, Donald Trump, deklaroi se ka arritur një nga objektivat kryesore të operacioneve ushtarake kundër Iranit, duke pretenduar se aftësia e Teheranit për të ndërtuar armë bërthamore është eliminuar. Megjithatë, sipas raportimeve të The New York Times, nuk ka prova të qarta që rezervat e karburantit bërthamor të Iranit janë shkatërruar ose neutralizuar.

“Kisha një qëllim: ata nuk do të kenë armë bërthamore dhe ky qëllim është arritur,” u shpreh Trump nga Zyra Ovale. Deklarata e tij vjen ndërsa zyrtarë të lartë të administratës, përfshirë Sekretarin e Shtetit Marco Rubio dhe Sekretarin e Mbrojtjes Pete Hegseth, kanë sugjeruar ditët e fundit se objektivat e luftës janë përmbushur, duke i hapur rrugë mundësisë për të shpallur përfundimin e konfliktit. Megjithatë, ambiciet bërthamore të Iranit ishin arsyeja kryesore për nisjen e operacionit ushtarak më 28 shkurt. Në atë kohë, Trump paralajmëroi se Irani po përpiqej të rindërtonte programin e tij bërthamor dhe të zhvillonte raketa me rreze të gjatë veprimi që mund të kërcënonin aleatët e SHBA-së.

Sipas raportit, Irani vazhdon të zotërojë rreth 440 kilogramë uranium të pasuruar në nivele të larta, sasi e mjaftueshme për të prodhuar 10 deri në 12 bomba bërthamore nëse përpunohet më tej. Gjithashtu, vendi disponon edhe rezerva të tjera të uraniumit të pasuruar mesatarisht, që mund të shndërrohen në material për armë. Drejtori i përgjithshëm i International Atomic Energy Agency, Rafael Grossi, deklaroi se nuk ka prova që materiali bërthamor është zhvendosur nga objektet kryesore, përfshirë ato në Isfahan dhe Natanz. Ai theksoi se, ndonëse sulmet kanë dëmtuar programin bërthamor iranian, çështje të rëndësishme mbeten ende të pazgjidhura.

Sipas raportimeve, SHBA dhe Izraeli kanë shqyrtuar edhe mundësinë e një operacioni të forcave speciale për sekuestrimin e materialit bërthamor, por plani është konsideruar shumë i rrezikshëm për shkak të mbrojtjes së fortë nga Garda Revolucionare e Iranit. Një alternativë tjetër mbetet rruga diplomatike, e ngjashme me marrëveshjen e vitit 2015, nga e cila SHBA u tërhoq në vitin 2018 me vendim të Trump. Ekspertët paralajmërojnë se, nëse rezervat e uraniumit mbeten nën kontrollin e Iranit, pretendimi për eliminimin e kërcënimit bërthamor mund të vihet në pikëpyetje, duke krijuar sfida politike dhe strategjike për administratën amerikane. Ndërkohë, vetë Trump ka lënë të kuptohet se mund të pranojë një status quo të përkohshme, duke sugjeruar se çdo kërcënim i ardhshëm mund të trajtohet nga administratat pasuese. bw