Britania nuk do të përfshihet në luftën në Iran, ka deklaruar kryeministri Keir Starmer, një deklaratë që duket se adreson kritikat nga Shtëpia e Bardhë për refuzimin e tij për t’iu bashkuar sulmeve amerikano-izraelite ose për të dërguar anije luftarake në Ngushticën e Hormuzit, një rrugë kyçe detare e cila është bllokuar.

Në një konferencë për shtyp, ai theksoi se konflikti duhet të përfundojë sa më shpejt, sepse sipas tij, “sa më gjatë të zgjasë, aq më e rrezikshme bëhet situata dhe aq më keq është për koston e jetesës këtu në shtëpi.”

“Prioriteti ynë është gjithmonë interesi kombëtar dhe për këtë arsye kemi qenë të qartë dhe të qëndrueshëm në objektivat tona gjatë gjithë këtij konflikti. Së pari, ne do të mbrojmë njerëzit tanë në rajon. Së dyti, ndërsa ndërmarrim veprimet e nevojshme për të mbrojtur veten dhe aleatët tanë, nuk do të përfshihemi në një luftë më të gjerë. Dhe së treti, do të vazhdojmë të punojmë drejt një zgjidhjeje të shpejtë që sjell sigurinë dhe stabilitetin përsëri në rajon dhe ndalon kërcënimin iranian ndaj fqinjëve të tij.”, u shpreh ai.

Më tej, ai ritheksoi rëndësinë për të vazhduar mbështetjen ndaj Ukrainës, duke theksuar se nuk duhet të lejojnë që Putin të përfitojë nga lufta në Iran.

“U takova me kryeministrin kanadez Mar Carney më herët këtë mëngjes dhe do të takohem së shpejti me presidentin ukrainas Volodymyr Zelensky sepse është jetike që ne të vazhdojmë të përqendrohemi në mbështetjen e Ukrainës. Nuk mund të lejojmë që lufta në Gjirin Persik të shndërrohet në një të ardhur të papritur për Putinin.”, u shpreh ai.

Kujtojmë që SHBA-të hoqën përkohësisht sanksionet për naftën ruse që ishte tashmë në det javën e kaluar, ndërsa çmimet e naftës së papërpunuar u rritën ndjeshëm pasi Irani pothuajse mbylli Ngushticën e Hormuzit, e cila shërben si një kanal për rreth një të pestën e naftës botërore. gsh