Ish-princi Andrew, i njohur edhe si Andrew Mountbatten-Windsor, ka irrituar figura në mbarë botën dhe ka mbajtur shoqëri “të dyshimta” gjatë kohës që shërbente si i dërguar tregtar i Mbretërisë së Bashkuar, aq sa zyrtarë të Whitehall ngritën shqetësime serioze, sipas zbulimeve të fundit.

Burime nga ish-qeveria e koalicionit pohuan për Daily Mail se Andrew shihej gjerësisht si një barrë, por largimi i tij nga posti zyrtar konsiderohej politikisht i ndjeshëm, pasi rrezikonte të përfshinte Buckingham Palace në një përplasje publike.

Vince Cable, i cili ishte sekretar i Biznesit në vitin 2011, deklaroi se ish-Duka i Jorkut, që mori detyrën e të dërguarit në vitin 2001, “konsiderohej si dikush që përfitonte pa dhënë shumë dhe nuk ishte veçanërisht i dobishëm, ndaj do të preferonim të mos kishim të bënim me të”.

“Por për shkak se ishte anëtar i familjes mbretërore, linja zyrtare ishte se, sigurisht, ai po bënte një punë të shkëlqyer”, tha ai për The Observer.

Një tjetër ish-zyrtar i lartë i Whitehall deklaroi se ambasadorët ankoheshin shpesh për organizimin e pritjeve madhështore, pasi Andrew “mbërrinte me vonesë, fliste vetëm për vajza të reja dhe të largohej herët”.

Ndryshe nga anëtarë të tjerë të familjes mbretërore, të cilët shpesh “i linin të gjithë të kënaqur”, ish-princi kishte një personalitet që “shpesh linte pasoja”, sipas zyrtarit.

Vendimi për të ndërprerë përfundimisht lidhjet me Andrew u mor në vitin 2011, pasi u publikua një fotografi ku ai shfaqej me krahun rreth Virginia Giuffre, e cila ka pretenduar se ishte shfrytëzuar seksualisht nga princi.

The Mail on Sunday zbuloi se qeveria ishte paralajmëruar që në vitin 2002 nga një ambasador britanik se sjellja e Andrew si ambasador tregtar po dëmtonte vendin dhe familjen mbretërore. Ai ishte rekomanduar për këtë rol nga arkitekti i “New Labour”, Peter Mandelson, reputacioni i të cilit është tronditur pas publikimit të dosjeve Epstein.

Dokumente diplomatike të rrjedhura tregojnë se Patrick Nixon, atëherë ambasador në Emiratet e Bashkuara Arabe, u shpreh pas vizitës së Andrew në nëntor 2001: “U alarmova veçanërisht nga disa komente të pahijshme dhe fyese për Arabinë Saudite dhe naftën e saj, që ai bëri para emiratasve të nderuar”.

Nixon paralajmëroi gjithashtu se Andrew kishte shpërfillur me mungesë respekti personalitete të rëndësishme, përfshirë një anëtar të familjes mbretërore emiratas, gjatë një pritjeje në ambasadë, duke pretenduar se ai “më shumë e dëmtoi sesa e përmirësoi pozitën tonë dhe atë të familjes mbretërore”.

Megjithatë, pavarësisht se shqetësimet arritën deri te drejtuesit e shërbimit diplomatik në Ministrinë e Jashtme në Londër, u deshën gati dhjetë vjet që Andrew të detyrohej të largohej nga posti për shkak të lidhjeve të tij me financierin pedofil Jeffrey Epstein.

U raportua se Andrew pranoi të hiqte dorë nga posti pas një bisede mes David Cameron dhe Mbretëreshës së ndjerë Queen Elizabeth II.

Deri atëherë, sipas raportimeve, kishte pasur reagime nga shumë ambasadorë dhe konsuj se prania e Andrew ishte në fakt kundërproduktive.

Një figurë e lartë e qeverisë së koalicionit tha se zyrtarët kishin ngritur alarmin për “miqtë e dyshimtë” të ish-princit.

Zbulimet e fundit shtojnë pikëpyetjet se përse sjellja dhe aktivitetet e Andrew nuk iu nënshtruan një kontrolli më të rreptë më herët.

Vince Cable shprehu zemërim kur mësoi se Andrew kishte vizituar Kinën përpara një udhëtimi të rëndësishëm qeveritar në nëntor 2010, duke thënë se tani e kupton se ai “duket se kishte qenë atje muajin e mëparshëm duke zhvilluar negociatat e veta dhe askush nuk na kishte njoftuar”.

Email-e të publikuara nga Departamenti amerikan i Drejtësisë treguan se Andrew mori me vete në udhëtimin në Kinë në vitin 2010 një nga bashkëpunëtorët më të afërt të Epstein, David Stern.

Këto udhëtime kishin për qëllim promovimin e biznesit britanik dhe tërheqjen e investimeve përmes vizitave jashtë vendit të financuara nga taksapaguesit.

Ato duhej të organizoheshin nga qeveria, por në një shkelje të dukshme të protokollit, email-et zbulojnë se Stern ishte ftuar të “ndihmonte” në planifikimin e vizitës në Kinë. Panorama