Presidenti i Shteteve të Bashkuara Donald Trump ka deklaruar se do të urdhërojë Pentagonin dhe agjenci të tjera federale të nisin procesin për publikimin e dokumenteve qeveritare që lidhen me jetën jashtëtokësore.

Në një postim në platformën e tij Truth Social, Trump tha se vendimi është marrë “bazuar në interesin e jashtëzakonshëm të treguar” nga publiku, duke e cilësuar çështjen si “jashtëzakonisht interesante dhe të rëndësishme”.

“Bazuar në interesin e madh të treguar, do të drejtoj Sekretarin e Luftës dhe departamentet e tjera përkatëse që të fillojnë procesin e identifikimit dhe publikimit të dosjeve qeveritare lidhur me jetën aliene dhe jashtëtokësore, fenomenet ajrore të paidentifikuara (UAP), objektet fluturuese të paidentifikuara (UFO) dhe çdo informacion tjetër të lidhur me këto çështje komplekse, por tejet interesante dhe të rëndësishme”, shkroi ai.

Njoftimi erdhi vetëm pak orë pasi Trump akuzoi ish-presidentin Barack Obama për zbulim informacioni të klasifikuar, pas një interviste të publikuar të shtunën.

Gjatë paraqitjes në podcastin e Brian Tyler Cohen, Obama u shpreh me ironi: “Janë realë, por unë nuk i kam parë dhe nuk po mbahen në Area 51. Nuk ka një strukturë nëntokësore, përveç nëse ekziston një komplot i madh dhe ata e kanë fshehur nga presidenti i Shteteve të Bashkuara.” Panorama