Presidentja e përkohshme e Venezuelës, Delcy Rodríguez, njoftoi të premten shpalljen e një amnistie të përgjithshme dhe mbylljen e qendrës famëkeqe të paraburgimit El Helicoide, më pak se një muaj pas operacionit ushtarak amerikan që çoi në kapjen e presidentit Nicolas Maduro. Duke folur para Gjykatës Supreme (TSJ), Rodríguez deklaroi se qeveria do t’i paraqesë parlamentit një ligj amnistie që mbulon të gjithë periudhën e dhunës politike nga viti 1999 deri më sot. Sipas saj, ligji synon “shërimin e plagëve të konfliktit politik” dhe rivendosjen e bashkëjetesës kombëtare.

Ajo konfirmoi gjithashtu se burgu El Helicoide, i cilësuar nga opozita dhe organizatat e të drejtave të njeriut si një qendër torture për të burgosurit politikë, do të mbyllet dhe do të shndërrohet në një qendër sociale, kulturore dhe sportive.

Autoritetet venezueliane pretendojnë se më shumë se 800 të burgosur politikë janë liruar, ndërsa organizata joqeveritare Foro Penal e kundërshton këtë shifër, duke raportuar vetëm 383 lirime dhe rreth 711 të burgosur që ende mbeten në qelitë e vendit. Njoftimi u prit me shpresë nga familjarët e të paraburgosurve, shumë prej të cilëve kanë ngritur kampe para burgjeve. “Është një gëzim i madh, një çlirim i plotë”, tha Betsy Orellana, nëna e një të arrestuari politik.

Megjithatë, Foro Penal paralajmëroi se amnistia nuk duhet të çojë në pandëshkueshmëri dhe se nuk mund të përfshijë shkelje të rënda të të drejtave të njeriut apo krime kundër njerëzimit.

Ndërkohë, liderja e opozitës dhe laureatja e Çmimit Nobel për Paqen 2025, Maria Corina Machado, deklaroi se masat janë rezultat i presionit amerikan dhe jo një akt vullnetar i qeverisë. Zhvillimet vijnë në një moment të ri afrimi diplomatik mes Uashingtonit dhe Karakasit, pasi SHBA-të konfirmuan se nuk ka më qytetarë amerikanë të paraburgosur në Venezuelë.bw