Pesë gra humbën jetën nga shpërthimi i fuqishëm dhe zjarri i madh që pasoi në orët e para të mëngjesit të së hënës, 26 janar, në fabrikën e biskotave “Violanta” në Trikala të Greqisë.

Zhurma e shpërthimit ishte aq e fortë, sa u dëgjua edhe në fshatrat përreth, sipas dëshmive të banorëve. Nga zjarri u zhvillua një temperaturë mbi 1.000 gradë Celsius, tregues i faktit se çeliku u shkri, ndërsa një pjesë e infrastrukturës u shemb si pasojë e shpërthimit dhe nxehtësisë ekstreme që u krijua.

Që nga orët e para të mëngjesit, në vendngjarje ndodhet një ekip i posaçëm i Drejtorisë për Hetimin e Zjarreve dhe Eksplozioneve, i cili po merr dëshmi nga punonjësit që arritën të shpëtonin nga zjarri, me qëllim mbledhjen e informacioneve dhe zbardhjen e shkaqeve që çuan në shpërthim.

Viktimat e tragjedisë

Viktima e parë që është identifikuar është 42-vjeçarja Vasiliki Skabardoni, nga Gardiki i Trikalasë, nënë e dy fëmijëve dhe mjaft e njohur në komunitetin lokal, pasi më parë kishte një sallon parukerie në zonë, përpara se të punësohej në këtë fabrikë.

Mes viktimave janë gjithashtu 45-vjeçarja Elena Katsaru nga fshati Glinos dhe Stavroula Bukovala nga Kardica. Sipas informacioneve të deritanishme, të treja gratë ishin nëna të fëmijëve të vegjël.

Të gjitha trupat e pajetë që janë nxjerrë nga rrënojat janë dërguar në morgun e Spitalit të Përgjithshëm të Larisës, ku familjarët po japin mostra ADN-je për identifikimin zyrtar të viktimave.

Si ndodhi tragjedia?

Zjarri shpërtheu pak para orës 04:00 të mëngjesit dhe dogji një pjesë të fabrikës. Pak më herët kishte ndodhur një shpërthim i fuqishëm në bodrumin e godinës qendrore të fabrikës, e cila ndodhet në rrugën kombëtare Trikala–Kardica.

Sipas informacioneve, shpërthimi që shkaktoi zjarrin e madh në ambientet e fabrikës ndodhi në qendër të kompleksit industrial të “Violanta”.

Punëtoret e ndjera u gjetën në bodrumin e fabrikës, shumë pranë njëra-tjetrës pas shpërthimit. Deri më tani janë nxjerrë katër trupa, ndërsa është lokalizuar edhe i pesti.

Çfarë po hetohet për shkaqet e shpërthimit?

Sipas informacioneve, fabrika e njohur e prodhimit të biskotave përdorte gaz të lëngshëm (LPG). Megjithatë, gjatë kontrollit të parë, rezervuarët e gazit që ndodhen në ambientin e jashtëm nuk duket se kanë pasur ndonjë problem.

Për këtë arsye, hetimet do të përqendrohen tani në ambientet e brendshme të fabrikës, ku gjithashtu përdorej gaz i lëngshëm.

Përgjigjet përfundimtare për shkaqet e tragjedisë pritet të jepen pas përfundimit të ekspertizës në terren dhe marrjes së të gjitha dëshmive. Gjithashtu, janë caktuar ekspertë nga Athina: një elektricist, një kimist dhe një piroteknik, të cilët do të dorëzojnë raportet e tyre pas hetimeve në vendngjarje.

Ndërkohë, kryetari i Qendrës së Punës së Trikala, Dimitris Armagos, deklaroi për protothema.gr se gjatë verës së kaluar ishin kryer kontrolle në fabrikë dhe ishin bërë vërejtje konkrete, kryesisht lidhur me daljet e emergjencës dhe sistemin e zbulimit të mundshëm të rrjedhjeve të gazit të lëngshëm që përdorej në furrat e prodhimit.

“E kishim vizituar këtë fabrikë gjatë verës së vitit 2025, me kërkesën tonë, për të konstatuar nëse respektoheshin masat e higjienës dhe sigurisë, në kuadër të një kontrolli të përgjithshëm. Gjatë vizitës evidentuam probleme dhe bëmë vërejtje konkrete, kryesisht për daljet e emergjencës dhe sistemin e zbulimit të rrjedhjeve të mundshme të gazit që përdorej në furra.

Ne i regjistruam dhe i theksuam këto probleme. Çfarë ndodhi më pas, nuk e di. Në përgjithësi, si qendër punëtorësh kërkojmë kontrolle të rregullta, por në shumicën e rasteve na lejohet të arrijmë vetëm deri te hyrja e ambienteve”, tha ai. gsh