Banorët e fshatit Katund i Ri, në Yrshek të Tiranës, kanë denoncuar një problem serioz që po rrezikon shëndetin dhe jetesën e banorëve të zonës.

Sipas denoncimit, gjatë punimeve për rregullimin e autostradës Tiranë–Durrës nuk është parashikuar dalja e tubit kryesor të kanalizimeve të ujërave të zeza për gjithë fshatin. Si pasojë, kanalizimet janë bllokuar dhe ujërat e zeza kanë nisur të dalin nëpër banesat e banorëve, duke krijuar një situatë alarmante.

Qytetari shprehet se problematika është bërë e ditur edhe pranë Ujësjellës Kanalizime Tiranë (UKT), por pa rezultat. Sipas tij, punonjësit e UKT-së kanë shkuar në terren, kanë konstatuar situatën dhe kanë bërë vetëm fotografi, për t’u larguar më pas pa dhënë asnjë zgjidhje konkrete.

Banorët e Katundit të Ri kërkojnë ndërhyrje urgjente nga institucionet përgjegjëse, pasi situata po përkeqësohet dhe përbën rrezik serioz për shëndetin publik. Ata apelojnë për zgjidhje të menjëhershme dhe rikthimin e funksionimit normal të kanalizimeve.

Denoncimi i qytetarit për JOQ

“Përshëndetje, jam një banor i fshatit Katund i Ri, Yrshek, Tiranë. Kam një shqetësim për kanalizimet e ujërave të zeza të fshatit. Me rregullimin e autostradës Tiranë–Durrës nuk i kanë lënë dalje tubit kryesor të ujërave të zeza të gjithë fshatit. Të gjitha ujërat na dalin nëpër shtëpi. Vijnë punonjësit e UKT-së, bëjnë vetëm foto dhe ikin. Do ju dërgoj edhe foto të problemit. Faleminderit.”