LUNDËR KRAHU- Poezi nga RUZHDI GOLE

December 9, 2025

1.

Dëshiroj të pamundurën :

më shumë se ç’e kam

dashur ta dua gruan,

tani dhe përhera çiltër

ne dhembshurohemi

dhembshuria na bën

më të shtrenjtë

më të dashur

se gjithnjë

pak vyshkur

pak perënduar…

2.

Të pamundurën dëshiroja herët :

me fëmininë time të sillesha

më pak i nxituar më i urtë,

një mollë të dy përtypëm

jetuam të dy një kollë

na ngrohu trikoja

e zemërgjerësisë

asnjëherë

njëri tjetrin

një gisht

s’e prekëm

e lënduam

veç me flladin

e fjalës së urtë.

3.

Dëshiroja dikur më të pamundurën :

të ngjisja gëzimtar Himalajet

voc’rrak hutuar i moçëm,

tani çdo mëngjes

kodrës ngjitem

duke përpirë

kupën e saj

të gjelbërt

mahnitje

dhe

qiell të kaltër

shumë tronditës

kërlesh buzagaz

borëtimeve të botës.

4.

Përhera mua

një spirancë më shfaqet

afër, në bregun mendimtar,

po zbres tëposhtë

ta takoj të lundroj

me të

nëse

krahun tim

kjo ëndërr detare

e dëshiron ende lundërtar …

• twitter

  Follow
• facebook
• linkedin

Fjalë kyçe: RUZHDI GOLE