Avokati Marash Logu ka publikuar një koment të Kodit të Procedurës Penale, e cila sipas tij sqaron qartë se një ministër mund të pezullohet nga ushtrimi i detyrës.

Logu i referohet komentimit të vitit 2019 të gjyqtarit të Gjykatës së Posaçme të Apelit për Korrupsionin dhe Krimin e Organizuar, Dhimitër Lara, një material i botuar me miratimin e Shkollës së Magjistraturës dhe i përdorur si tekst formimi për magjistratët e rinj.

Sipas asaj që ka publikuar avokati, gjyqtari Lara analizon masën ndaluese të pezullimit nga funksioni publik, sipas nenit 242 të Kodit të Procedurës Penale.

Sipas interpretimit të tij, ndërsa për figura të zgjedhura si deputetët apo kryebashkiakët masa e pezullimit nuk mund të aplikohet, situata ndryshon për funksionarët e emëruar, si ministrat, prokurorët dhe vetë gjyqtarët.

Reagimi i Marash Logut vjen në kulmin e debatit mbi vendimin e GJKKO mbi pezullimin nga detyra të Belinda Ballukut, e marrë tashmë nën hetim nga SPAK për dy afera korruptive, Tunelin e Llogarasë dhe Unazën e Madhe të Tiranës.

Avokati Marash Logu

Më qartë dhe më shqip se kaq nuk mund të thuhet: MINISTRI MUND TË PEZULLOHET NGA DETYRA!

Në vitin 2019, gjyqtari i Gjykatës së Posaçme të Apelit për Korrupsionin dhe Krimin e Organizuar, Dhimitër Lara publikoi komentarin e Kodit të Procedurës Penale, produkt i një eksperience 25-vjeçare në sistemin e drejtësisë, i aprovuar për botim nga Shkolla e Magjistraturës si një ndër tekstet mbi të cilat formohen magjistratët e rinj Në fq. 762 – 763, gjyqtari Lara ka trajtuar edhe masën e ndaluese të pezullimit të ushtrimit të një funksioni publik, parashikuar nga neni 242 i Kodit të Procedurës Penale.

Konkretisht gjyqtari shprehet: “Për çka rezulton, se përkundrejt një funksionari publik si deputeti apo kryebashkiaku, nuk mund të zbatohet masa e pezullimit të përkohshëm të detyrës që lidhet me funksionin që ai kryen, ndërkohë që për një funksionar publik si MINISTRI, prokurori apo vetë gjyqtari, që të tillë nuk zgjidhen sipas ndonjë ligji elektoral, të mund të caktohet dhe zbatohet masa e sigurimit ndaluese e pezullimit të ushtrimit të detyrës/funksionit, qoftë si MINISTËR, gjyqtar apo prokuror apo kujtdo detyre që përfshihet në ‘funksionin publik’ apo ngarkimin në “shërbimin publik”.” Panorama