Dronët ‘Sea Baby’ të Shërbimit të Sigurisë së Ukrainës qëndrojnë pas sulmeve të fundit ndaj tankerëve KAIRO dhe VIRAT në Detin e Zi ditën e djeshme, sipas mediave ukrainase.

Burime të agjencisë ukrainase UNN, informuan se operacioni u krye nga Drejtoria e 13-të Kryesore e Kundërzbulimit Ushtarak të SBU-së, në bashkëpunim me Marinën Ukrainase dhe shkaktoi dëme serioze në tankerët që i përkisnin flotës në hije ruse.

Sipas të njëjtave burime, dronët e përmirësuar Sea Baby janë të aftë të mbulojnë distanca të gjata dhe kanë koka raketore të përmirësuara.

Videot që qarkullojnë në rrjet tregojnë dronët që i afrohen objektivave të tyre dhe sulmet. Sipas UNN, nga imazhet është e qartë se të dy tankerët pësuan dëme serioze, duke rezultuar në nxjerrjen jashtë shërbimit të tyre.

Tankerat CAIRO dhe VIRAT kanë kapacitetin për të transportuar naftë ruse me vlerë gati 70 milionë dollarë. Të dy tankerët janë subjekt i sanksioneve perëndimore për transportimin e naftës nga portet ruse, pavarësisht një embargoje të vendosur pas pushtimit të Ukrainës nga Rusia në shkurt të vitit 2022.

Drejtoria Turke e Çështjeve Detare (DGM) publikoi mbrëmë imazhe që tregonin anijen Kairos në flakë dhe tym të zi të dendur që ngrihej nga anija. DGM tha se rezervuarët e cisternës ishin bosh, përveç karburantit të saj, dhe ajo po lundronte drejt portit rus të Novorossiysk, i vendosur në bregdetin verilindor të Detit të Zi pranë hyrjes në Detin e Azov, në Rusinë jugore.

Terminali kryesor i naftës pranë portit të Novorossiysk gjithashtu pezulloi operacionet herët këtë mëngjes pasi një sulm nga një dron dëmtoi një nga tre vendet e tij të ankorimit, tha operatori i terminalit, duke e quajtur atë një “sulm terrorist të synuar”.

Autoritetet turke, të cilat ende nuk kanë gjetur ndonjë ndotje rreth Kairos, thanë se një ekip ekspertësh mjedisorë dhe zhytës do të vendoset atje sapo të shuhet zjarri në anije.

Sipas faqes së specializuar të internetit ‘VesselFinder’, CAIRO u ndërtua në vitin 2002 dhe Virat në vitin 2018. Të dy anijet janë shënjestër e sanksioneve nga Bashkimi Evropian dhe Komonuelthi, si dhe nga Shtetet e Bashkuara për VIRAT. gsh