MAQEDONIA E VERIUT– Këngëtari i njohur shqiptar Shpat Kasapi ka ndërruar jetë në Itali, në moshën 40-vjeçare, duke lënë pas një dhimbje të thellë te familja, miqtë dhe mijëra fansa në Shqipëri, Kosovë dhe Maqedoninë e Veriut. Sipas informacioneve për mediat, Shpati kishte shkuar në Itali për një koncert.

Pasi kishte mbërritur në hotel, mësohet se ai është ndjerë papritur keq dhe ka pësuar arrest kardiak, duke humbur jetën menjëherë. Pas vetes ai ka lënë djalin e vogël, Roelin, i cili tashmë do të rritet vetëm nga e ëma, Selvija.

Tragjedia e Shpatit ngjan shumë me fatin e të atit, këngëtarit dhe tekstshkruesit të njohur Naim Kasapi, i cili gjithashtu ka ndërruar jetë në moshë të re, duke lënë fëmijët jetimë.

Nëna e Shpatit, Gjylymsere Kasapi, pedagoge në Universitetin e Shkupit dhe ish-deputete, ka treguar më herët për sakrificat e rritjes së fëmijëve pas humbjes së bashkëshortit.

Roli i të “fortës” i bie bashkëshortes së tij, Selvijes, e cila do të duhet të rrisë e vetme vogëlushin Roel, ashtu si dikur Gjylymserja rriti e vetme Shpatin dhe motrën e tij./ Dosja.al