ZOGU AG- Poezi nga RUZHDI GOLE

November 13, 2025

Përhera, ditënatë, një zog fluturon

nga Kulla e Sahatit të Tiranës

për në bregdetin port

me sirena në kokë

dhe me postë

të kaltër.

.

Zogu i Agut

më i mjeri dhe më i lumi fat

vëlla i të gjithë fluturakëve

kraharon pari vrullshëm,

sheh mëngjesin ciflos’

pas një kontrabande

me tyta vula frak

sheh mëngjesin

paqtë tek puth

ëndërr buzësh.

.

Zogu frymor lart pikas gjithçka, ulet

i bien pëndët e i drithërojnë sytë,

qielli me nishane mardhet

vojtja ngjethet ujeve

prej çdo drame

.

atdheu im

fal çka s’falet

hajdutët – trima huq.

.

Për be, për be…asnjë re të kaltër

Zogu në qiell më nuk e gjen

krahëlehtë, rëndë – rëndë,

re xhufkazeza therrmë

shpejt i afrohen

ta përpijnë

përzënë.

.

Ku të fshihet Zogu i zogjve

zogu ynë i gjithë Lutjeve

hiç eskortë hiç kobure

hiç helmetë,

.

ata, që e duan kanë ikur

tutje prej k’saj aorte

ata që janë afër

i ledhin pulpat

qytetthit tim

tëndin tonin

çalë – çalë

atlet.

.

A e keni parë Zogun të fluturojë

mbi Amfiteatrin dyrrahas

mbi Torrën veneciane

këtë mëngjes glob,

ende s’e keni

parë të vij

prej asaj

Tirane

.

s’ka shpresë… të shpresojmë ?

.

Sa e gjatë rruga nga Kulla e Sahatit

të mbërri’ në portin Dyrrah-Durrës,

Oooooooo ….

Zogu ende nuk është ngritur

në ajër, sheshi “Skënderbe”

i dhimbsuri jetëpërflakuri

mban në duar zogun

me postë të djegur

(prej çdo gjaksi)

mbuluar

me kurorë

puplash ….shurdhët.

.

Përhera, ditënatë, fluturon Zogu Ag..

• twitter

  Follow
• facebook
• linkedin

Fjalë kyçe: RUZHDI GOLE