NUK MBAJ MEND

.

Nuk mbaj mend
apo nuk e di,
duket si një gënjeshtër,
apo fsheh një dhimbtë.

.

Kanë kaluar shumë vite,
askush nuk do të besoj,
kujtesa nuk mbron gjithmonë
diçka ka fshirë.

.

Ah, kujtimet ikin,
Edhe ato të mirat…
pa Lamtumirë.

.

2 D

.

Diktatura ka nevojë për të nënshtruarit,
aq shumë i do,
bën sikur i puthë…

Demokracia nuk ka nevojë,
po nuk e deshe,
ajo të përbuzë…

.

NJË KORE BUKE NGA TIRANI

.

Zogj me krahë
pa pupla që njohin
vetëm kafazin…

–

E rrokin lirinë,
një Alienë e huaj,
e largtë.

.

Të sigurtë,
hapin sqepin për pak kokrra drithë,
ushqehen prej tiranit,
të njohur,
ndër breza,
djalë pas djalit…

.

ANI, ANI…VDEKJA KA NISË ME ARDHË

.

Vdekja ka nisë me ardhë…
Kapuçët e gjunjëve me eshtnit e kembëve kanë nisë me u zanë,
rezët e dyerve
kanë ngelë pa vaj,
ditë e natë rrinë tuj cijatë…
E prapë kurr nuk ndalem,
deri në fund kam me ecë.

.

Vdekja ka nisë me ardhë,…Kurrizi nuk është ma drejtë,
mullar bari
njanue prej bore,
hangër fundin
prej dhenëve n’trolli
pa e sos dimri krejt.
E prapë ashtu me kurriz të kthyem
deri në fund nuk do të ndalem,
kam me ecë.

.

Vdekja ka nisë me ardhë…
Gjyksi gjuhet hucla,
kërcet kokrrizi n’shikulla n’bjeshkë,
fryma hyn e del ngadal
pa u ndie
si postagjia nën brrylë t’lokës,
n’margëz t’oxhakit tuj u zhagitë poshtë e përpjetë.
E prapë do të marrë frymë deri në fund,
kurr nuk do të ndalem,
kam me ecë.

–

Vdekja ka nisë me ardhë…
E kryet ka nisë t’ushtoj,
vegshi me çorbë plancash n’prush tuj u derdhë,
hini e avulli nuk le me i pa veringtë e oxhakit vjerrë.
E prapë kryet do ta çoj deri në fund,
me kryet lart kurr nuk do të ndalem,
kam me ecë.

.

E në fund,
kur trupin tim ta mbulojnë me dhe,
vdekjes do i them kot e ke moj bushtër,
e n’gjuhën time të dytë,
fak ju ( fuck you ).
Mbaje trupin tim ku të duash,
e kur të duash,
në vendlindjen time
shpirti im ka me ecë.

.

VARGJET E MIA SI FËMIJTË E PLEQËVE

.

Vargjet e mia
janë si fëmijtë e pleqeve,
pa i marrë
kush perdore në shkollë,
pa i çue kush në park
a në plazh asnjë dite…

.

Emrin e prindërve
duan ta harrojnë kur prezantohen,
askush nuk u tha djali i bosit,
i presidentit
a vajzë e shefit te policise…

.

Çuditem që disa i duan…
Duke fshire puthjet e pleqeve me dore janë rritë…

.

As dasma nuk bejnë kur martohen,
as ditëlindje nuk festojnë,
pa babë e nanë nuk bëhet vallja,
e paret lumë per orkestren nuk hidhen.

.

Edhe pse fëmijë pleqesh,
pa silikon i kanë faqet e gjinjté….

.

KUAJT E EGËR

.

Në gurrën time të muzës
pi ujë bashkë me kuajt e egër.

.

Vrapojnë
me vargjet e mia
pa shalë e pa fre.

.

Duke ju hedhë kokrra drithi e kripë në rrasa,
pa dashtë i zbusë,
i trembë.

.

E harroj,
nuk mbetën më trime
vargjet e mia.

.

Sepse,
kuajt e egër
nuk janë të egër më.

.

VAJZAT E BUKURA

.

Arti i vërtetë a magji
derdhë në krahët e tyre,
mbi lule e gjethe fluturojnë në ditët plot diell të pranverës.

.

Larg në fluturim
marrin gjithçka me vete, moshën nuk jua njohim, as emrat, as adresën,
…vetëm bukuria e tyre
në sytë tanë mbetet.

.

Nga lart shikojnë gjithë botën,
e ne mbetemi me sy prej tyre gjithë jetën.

.

Vetëm të bukura janë fluturat,
si askush tjetër në botë
ato nuk kanë emër tjetër…

.

TREVARGËSHE

•••
I bukur zog,
degë më degë këndon…
insektin në sqep se lëshon.

•••
Në mëngjes vjeshte
Pika vese mbi gjethe,
lotët e fundit të verës.

.

DASHURIA

E bekoj zotin
që nuk më dha gojë,
me mijëra pyetje që kam
askush nuk do të më dëgjoj…

.

KOHA

Është më e çmuara pasuri,
gjithnjë vjen,
që njeriu të shijoj botën.

.

Shiko, shiko vetëm bukuritë
e mos ke kurr frikë,
se e humbë kohën.

.

TË DUA

.

Të dua ! Të dua !
Të thuash të dua
nuk eshtë gjë e thjeshtë,
e as gjë që vjen
ashtu shpejtë, kaq shpejtë.

.

Ta thuash vazhdimisht, vazhdimisht kurr pa e ndërprerë, bëhet e besueshme, mbetet e vërtetë.

.

Pa menduar kurr se si ndihet tjetri,
midis nesh nuk ka me pas peshore që
mat dashurinë në jetë…?!