Një pjesë e librit më të ri të gazetarit dhe autorit investigativ italian, Nello Trocchia, po trazon opinionin publik në Itali dhe Shqipëri, pas publikimit të një fragmenti ku përmendet emri i Edi Ramës dhe lidhjet e njerëzve të qeverisë së tij me krimin e organizuar.

Në një postim të shpërndarë nga faqja Parliamo di mafia në Instagram, është publikuar një pjesë nga libri “Invincibili”, ku flitet për Artur Shehun, një nga figurat më të njohura të botës së krimit shqiptar. Postimi shoqërohet me mesazhin:

“Emri i Artur Shehut, një prej bosëve më të fuqishëm të mafias shqiptare, del në letrën anonime dërguar hetuesve pas atentatit ndaj gazetarit Sigfrido Ranucci. I njëjti Shehu i përshkruar nga Nello Trocchia mes resorteve luksoze, narkotrafikantëve ndërkombëtarë dhe lidhjeve me pjesë të pushtetit. Një pistë e rëndë, por në Itali: heshtje totale.”

Në librin “Invincibili”, Trocchia përshkruan ngritjen e Artur Shehut nga “mbreti i gomoneve” që trafikonin shqiptarë drejt Italisë, deri te një miliarder i fuqishëm që jeton në Miami dhe mban lidhje të ngushta me rrjete ndërkombëtare narkotrafiku dhe biznesmenë të lidhur me Sacra Corona Unita.

Autori shkon më tej, duke përmendur një takim sekret në Antilet Hollandeze, në janar të vitit 2019, ku sipas dokumenteve të Drejtorisë Antimafia italiane, kanë marrë pjesë Artur Shehu, bashkëpunëtorë të tij dhe përfaqësues të qeverisë së Edi Ramës.

“Për herë të parë zbuloj detajet dhe protagonistët e një takimi tronditës. Nga 24 deri më 31 janar 2019, përfaqësues të lartë të organizatës kriminale janë takuar në ishullin e Arubës, në Karaibe, me pjesëmarrjen e Artur Shehut dhe disa përfaqësuesve të paidentifikuar të qeverisë aktuale shqiptare,” shkruan Trocchia në librin e tij.

Kjo pjesë, e cila lidhet edhe me një letër anonime që e përmend këtë takim si pistë hetimi në atentatin ndaj gazetarit italian Sigfrido Ranucci, po konsiderohet një trazim serioz për raportet mes politikës shqiptare dhe mafias ndërkombëtare.

Në Itali, megjithatë, sipas Parliamo di Mafia, ka rënë heshtje totale: as qeveria, as opozita, as Komisioni Parlamentar Antimafia nuk kanë reaguar.

“Një takim i këtij niveli, midis narkotrafikantëve dhe përfaqësuesve të një qeverie – në çdo vend tjetër do të hapte komisione hetimore e debate publike. Por te ne, thjesht injorohet, sikur të mos kishte ndodhur asgjë,” shkruan faqja.

Sipas tyre, kjo është një dëshmi se gazetaria investigative po prek interesa të mëdha dhe të rrezikshme, ndërsa institucionet zgjedhin të mbyllin sytë.

PJESË NGA LIBRI:

Kush është Artur Shehu?
Në librin “Invincibili”, Nello Trocchia e përshkruan kështu:

“Artur Shehu është në Olimpin e të pushtetshmëve, dhe nëse nuk është Zeusi vetë, pak i mungon. Çfarë jete, çfarë karriere! ‘Tani është i fejuar me një ish-mis evropiane, ka një vilë koloniale në Miami, është qytetar amerikan. Komandon dhe kënaqet’, – rrëfen kush njeh mirë faktet dhe mëkatet e ‘Perandorit’.

Nga Miami ai drejton aktivitete me degë në të gjithë botën. Ishte në Vlorë kur rridhte gjak gjatë luftës civile, kur regjimi u rrëzua, kapitalizmi u bë i egër dhe anarkia sundonte me banda kriminale që luftonin njëra-tjetrën duke sulmuar depot e armëve.

‘Është një i mbijetuar i atyre përleshjeve me armë. Ishte mbreti i gomoneve, atyre të mbushura me të dëshpëruar që vinin në Itali. Deti gjithmonë kthehet: për të ikur nga uria, për të trafikuar, për t’u bërë i madh. Deti për të shpëtuar e për të ëndërruar një të ardhme më të mirë, deti për të fituar para. Shehu ishte aty në ato vite, para se të strehohej në Shtetet e Bashkuara, në Miami, ku ende jeton. Ka bërë rrugë të gjatë: nga gomonia te bizneset shoqërore me një prej mbretërve të Sacra Corona Unita, Albino Prudentino.

Perandoria e vogël e Shehut ndodhet në një copëz toke buzë detit në Vlorë. Një perandori që lidh Italinë dhe Shqipërinë: ndihmë reciproke, interesa të përbashkëta. Biznesi i së ardhmes që dy dekada më parë ishin lojërat dhe bastet: kazinoja. Dhe ajo kazino-restorant është ende aty, në një pallat gjigand; por kati i parë është i mbyllur, ndërsa akullorja poshtë është hapur dhe ka pronar tjetër.’

Dhe sot?
‘Aty është resorti i Shehut,’ – më thotë një burim. Jam në Vlorë. Ulem, ha një pjatë me fruta (…). Gjithçka e autorizuar nga autoritetet vendore dhe kombëtare. Ka bërë shumë rrugë Shehu, i njohur ndryshe si Tuke. Kam lexuar fjalët e tij të rrëfyera një bashkëpunëtori shqiptar në Itali, kam studiuar udhëtimet e tij në Evropë, takimet e tij me narkotrafikantët që njollosin duart.’

Pse autori anonim i letrës dërguar hetuesve lidhur me atentatin ndaj Ranuccit, për të cilin kemi folur gjerësisht këto ditë, ngul këmbë te libri i Trocchia-s?
Sepse ai ka zbuluar për herë të parë një takim sekret midis Artur Shehut, bandës së tij dhe anëtarëve të qeverisë së Edi Ramës:

“Në fund të fundit, Shqipëria është një ishull i lumturisë së përjetshme. Miliarderët ndërtojnë aty resortet e tyre, kush ka para investon, turistët kalojnë pushimet, shtetet dërgojnë migrantët, narkotrafikantët pastrojnë paratë dhe festojnë sipërmarrjet e reja. Dhe pikërisht në një ishull dua ta mbyll këtë libër.

Jemi në Antilet Hollandeze, ku në janar të vitit 2019, sipas Drejtorisë Antimafia italiane, do të ishte zhvilluar një takim midis biznesmenëve, narkotrafikantëve dhe përfaqësuesve të qeverisë së Ramës. Pikërisht kështu. Për herë të parë zbuloj detajet dhe protagonistët e një takimi tronditës. Kush mori pjesë? Kush ndodhej në atë ishull të Antileve në vitin 2019? Të lexojmë çfarë shkruajnë hetuesit italianë:
‘Gjithashtu kemi dokumentuar se nga data 24 deri më 31 janar 2019, përfaqësuesit më të lartë të organizatës kriminale janë takuar në ishullin Karaib të Arubës (Antilet Hollandeze): të pranishëm ishin Artur Shehu (…) si dhe përfaqësues të paidentifikuar të qeverisë aktuale shqiptare në detyrë.’”

KOMENTI I ‘PARLIAMO DI MAFIA’:

Ky zbulim nuk është një detaj dytësor: është takimi midis një bosi ndërkombëtar dhe anëtarëve të qeverisë shqiptare, i dokumentuar nga hetuesit italianë. Një takim që për herë të parë rindërtohet publikisht në një hetim. Dhe është aq i ndjeshëm e i sikletshëm, sa ka përfunduar madje edhe në letrën anonime që lidh atë pistë me atentatin ndaj Sigfrido Ranuccit.

Kjo do të thotë diçka të thjeshtë: kjo temë prek interesa gjigande, aq të mëdha sa të nxisin kërcënime, presione, frikë dhe bomba.

E megjithatë, në Itali – heshtje totale.
Nuk flet qeveria, që duhet të merrej me infiltrimet kriminale ndërkombëtare.
Nuk flet opozita, që duhet të kërkonte sqarime.
Nuk flet as Komisioni Parlamentar Antimafia, që duhej të ishte i pari që hap një dosje hetimore.

Një takim i këtij niveli – midis narkotrafikantëve dhe pjesëve të qeverisë – në çdo vend tjetër do të hapte interpelanca, komisione hetimore, emisione në “prime time”.
Por te ne, thjesht injorohet.
Sikur të mos kishte ndodhur asgjë.
Sikur të ishte normale që një bos i narkotrafikut, sot miliarder dhe rezident në Miami, të mund të ulet në një tryezë me anëtarë të një qeverie pa ndjerë askush – institucionalisht – detyrimin të shpjegojë pse.

Manipulim apo e vërtetë, ajo letër provon një gjë:
Gazetaria investigative po prek nerva të zhveshura, dhe ata që duhet ta mbrojnë, zgjedhin të shikojnë nga ana tjetër./sn