BE filloi sot zbatimin gradual të një sistemi të ri elektronik të kontrollit kufitar, të njohur si Sistemi i Hyrjes/Daljes (EES), i cili përfshin regjistrimin e gjurmëve të gishtërinjve të njerëzve nga vendet e palëve të treta dhe marrjen e fotografive të tyre përpara se të hyjnë në 29 vende evropiane.

Edhe pse futja në përdorim e sistemit të automatizuar filloi të dielën, i gjithë procesi do të zgjasë rreth gjashtë muaj që të zbatohet plotësisht në të gjitha shtetet anëtare të BE-së.

Aeroportet kryesore në Itali, duke përfshirë ato të aeroporteve të Fiumicino dhe Malpensa dhe portet e Xhenovës dhe Civitavecchia, filluan të dielën përdorimin e sistemit të ri, ndërsa Gjermania filloi gradualisht në Stuttgart.

Sipas Komisionit të BE-së, sistemi i ri dixhital synon të identifikojë personat që kanë tejkaluar afatin e qëndrimit me vizë dhe të luftojë migracionin e paligjshëm dhe mashtrimin me identitetin. Lançimi i tij erdhi si rezultat i presionit politik në rritje në shumë vende të BE-së që i bënin thirrje Bashkimit të mbante një qëndrim më të ashpër ndaj çështjeve të migracionit.

“Sistemi i Hyrjes/Daljes është shtylla kurrizore dixhitale e kuadrit tonë të ri të përbashkët evropian për migracionin dhe azilin”, tha në një deklaratë Komisioneri Evropian për Çështjet e Brendshme dhe Migracionin, Magnus Brunner.

“Çdo shtetas i një vendi të tretë që kalon kufirin e jashtëm do t’i nënshtrohet verifikimit të identitetit, kontrolleve të sigurisë dhe regjistrimit në bazat e të dhënave të BE-së”, shtoi Brunner.

Ai theksoi se “periudha gjashtëmujore e zbatimit u jep Shteteve Anëtare, udhëtarëve dhe bizneseve kohë për t’u përshtatur pa probleme me procedurat e reja”.

Zbatimi i skemës do të thotë që që tani e tutje, qytetarët jo-BE do të duhet të regjistrojnë të dhënat e tyre biometrike kur hyjnë për herë të parë në zonën Shengen.

Sistemi do të mbulojë të gjitha vendet e BE-së përveç Irlandës dhe Qipros, si dhe Islandën, Norvegjinë, Zvicrën dhe Lihtenshtajnin. Për udhëtimet pasuese, do të kërkohet vetëm verifikimi biometrik i identitetit.

Sistemi EES pritet të jetë plotësisht funksional më 10 prill 2026, kur vulat tradicionale në pasaporta do të zëvendësohen plotësisht nga hyrjet elektronike. bw