Edicioni i 9-të i ngjarjes vjetore “Let’s Dance”, organizuar nga Aksioni për Nëna dhe Fëmijë (AMC), shënoi sukses historik duke mbledhur mbi 40,000 € për mbështetjen e programeve shëndetësore që shpëtojnë jetë dhe krijojnë një të ardhme më të shëndetshme në Kosovë.

“Mjetet e mbledhura do të kenë ndikim të drejtpërdrejtë dhe afatgjatë në jetën e kaq shumë grave dhe fëmijëve,” tha Drejtorshaa Ekzekutive e AMC, Rina Demiri Spahija. “Qasja në kujdes shëndetësor cilësor nuk është privilegj, por e drejtë themelore dhe themeli për një të ardhme të shëndetshme”, ka thënë ajo.

Një mbrëmje për jetë më të shëndetshme

Ngjarja u mbajt më 23 shtator në sallën AMC Hall, ku qindra mbështetës të AMC-së u bashkuan në një mbrëmje me muzikë, rrjetëzim dhe festë. Atmosferën e ndezën këngëtarët Florent Abrashi, fitues i “The Voice of Albania 3”, dhe Adrian Berisha, i cili këtë verë performoi edhe në Sunny Hill Festival.

Historia e binjakëve që frymëzoi publikun

Një nga momentet më prekëse të mbrëmjes ishte rrëfimi i Behare Zeqirit, nënës së binjakëve Orgesi dhe Orgeti, të cilët si foshnje u shpëtuan falë pajisjeve të dhuruara nga AMC.

“Ka qenë një kohë shumë e vështirë për familjen tonë sepse nuk e dinim nëse do t’ia dilnin. Pasi morën terapinë, ata filluan të përmirësoheshin,” tha Zeqiri. “Sot, në moshën 19-vjeçare, janë të shëndetshëm, kanë përfunduar shkollën e mesme dhe kanë aplikuar për t’u bërë pjesë e policisë. Për ne, kjo është dhurata më e madhe në jetë”, është shprehur ajo.

Rezultatet e vitit të kaluar që po japin fryte

Publiku pati rastin të dëgjojë edhe një dëshmi tjetër prekëse, këtë herë nga Emi Uka, e cila përmes një video-mesazhi tregoi se si pompa e insulinës e siguruar nga fondet e vitit të kaluar ka ndryshuar jetën e djalit të saj 12-vjeçar, Siarit.

“Para se të merrnim pompën – që Siari e ka sot falë AMC-së dhe donatorëve – ishte shumë e vështirë për ne të dilnim jashtë. Sot, ai mund të dalë vetë. Do të doja që çdo fëmijë me diabet të kishte një pompë, sepse ajo nuk është luks, por mjet jetik,” tha Uka.

Kontributi i sponsorëve dhe përkrahësve

Suksesi i këtij edicioni nuk do të ishte i mundur pa mbështetjen e sponsorëve bujarë.

Sponsorë kryesorë:

Platin: Crimson Capital

Artë: Coca-Cola HBC, Mentor & Michelle Ahmeti

Argjendtë: Banka Ekonomike, FINCA Kosovo, NEPTUN

Bronztë: ACIBADEM, AMF Capital AG, Besa Pharm, Besa Security, BBros, BPB, KEP Trust, KRK, Limak, Meridian Express, SPAR, NLB Banka, PBC, Prime Events, RSR Kosova, SIGAL UNIQA Group.

Përkrahësit e tjerë: Florent Abrashi, Adrian Berisha, Fitore Rexhepi, Theranda Vineyards & Wine, Ardian Graphics, Arben Llapashtica, Chocolate Corner, Coca-Cola HBC, Gekos, Gjirafa, GO+, Sirius Hotel, KA Catering, Katror Media, Arbër Murturi – Maesta Film, KosovaJob, Mama Mantia, Papirun, Rugove Corporation, Tartine, Telegrafi, Tenda Muzaqi, Zhuzuff Kitchen.s

Aksioni për Nëna dhe Fëmijë (AMC) është organizatë jofitimprurëse që punon për të shpëtuar jetë dhe për të përmirësuar shëndetin e foshnjave, nënave dhe fëmijëve në Republikën e Kosovës. AMC avokon për kujdes shëndetësor më të mirë përmes edukimit, mbledhjes së fondeve dhe hulumtimit.