S’më solli halli tek ti, Paris!- Poezi nga FATBARDH AMURSI

September 21, 2025

Parisi,

I vetmi kryeqytet,

Që më është shfaqur në ëndërr,

Duhet të jesh patjetër nga Lindja,

Që pas Parisit të jesh paksa i çmendur.

.

Parisi i Harkut të Triumfit,

Luvrit,

Kullës Ejfel,

Të krijon idenë se s’pranon

Njerëz dokudo, pa klas,

Jo rastësisht u zgjodh Parisi

T’i bëhej Esat Pashës atentat.

.

Parisi,

Që çoi në gijotinë mbretër dhe Robespjerë,

Mbreti Zog e zgjedh për kapriço Francën,

Jo se aty e kish kokën më të sigurt se në atdhe,

Por s’mund të rrinte gjatë në Egjipt,

Kur vendi i piramidave e kish mbretin Faruk,

Në Anglinë e mbretërve i dukej vetja i tepërt,

Në Francë i shijonte më shumë kurora

Që Viktor Emanueli tentoi për t’ia vjedhur.

.

Enveri u nis nga Parisi

Dhe përfundoi në Moskë,

Kadare nga Moska në Paris,

Sikurse u kryqëzua rruga e metodës

Me atë të letërsisë.

.

S’më ka ndodhur

Që ëndrrat t’i plotësoj në kohë,

Edhe pse veten nuk e mbaj për të vonuar,

S’më solli halli tek ti Paris,

Por thjesht një dëshirë e vjetër

Për të salutuar.

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi