Forcat Ajrore Mbretërore Britanike (RAF) kanë ndërmarrë një mision mbrojtës të NATO-s mbi hapësirën ajrore të Polonisë, si pjesë e reagimit aleat ndaj inkursioneve të përsëritura të dronëve rusë, ka konfirmuar Ministria britanike e Mbrojtjes.

Dy avionë RAF Typhoon u ngritën në fluturim të premten në mbrëmje nga RAF Coningsby në Lincolnshire dhe patrulluan qiellin polak, të mbështetur nga një avion furnizues RAF Voyager, përpara se të ktheheshin në Mbretërinë e Bashkuar në orët e para të mëngjesit të së shtunës.

Misioni, i koduar si “Eastern Sentry”, është një pjesë kyçe e përpjekjeve të NATO-s për të forcuar krahun lindor të aleancës, pas 19 shkeljeve të regjistruara të hapësirës ajrore polake nga dronë rusë, që prej fillimit të muajit.

Tensionet në rajon janë rritur ndjeshëm, pasi krahas shkeljeve në Poloni, janë regjistruar inkursione nga dronë në Rumani dhe fluturime të avionëve rusë në hapësirën ajrore të Estonisë. Moska ka mohuar këto veprime.

Ministri britanik i Mbrojtjes, John Healey, deklaroi se ky mision i RAF dërgon një “sinjal të qartë se “Hapësira ajrore e NATO-s do të mbrohet.”

“Jam krenar për pilotët dhe ekuipazhin britanik që morën pjesë në këtë operacion të suksesshëm për të mbrojtur aleatët tanë nga agresioni i papërgjegjshëm rus”, tha ai. gsh