Presidenti i SHBA-së, Donald Trump, po diskuton opsionin për të dërguar kompani private ushtarake amerikane në Ukrainë, si pjesë e një plani paqeje për të parandaluar përshkallëzimin e luftës.

Sipas  Telegraph, këto kompani mund të ndihmojnë në ndërtimin e fortifikimeve në zonat strategjike, duke siguruar interesat amerikane dhe duke parandaluar njëkohësisht shkeljen e armëpushimit nga Rusia.

Burime të afërta me administratën e Trump kanë bërë me dije se plani është ende në shqyrtim dhe po diskutohen edhe masa të tjera sigurie, si policimi ajror dhe misionet detare në Detin e Zi. Ky plan është pjesë e një strategjie më të gjerë që përfshin rindërtimin e forcave të armatosura të Ukrainës, duke përfshirë riarmatosjen dhe trajnimin e ushtarëve nga aleatët evropianë të NATO-s.

Sipas burimeve, dërgimi i ushtrisë private do të shërbente si një zgjidhje e ndërmjetme për të qetësuar aleatët evropianë që shpresojnë se Shtëpia e Bardhë do të angazhohet më shumë për një zgjidhje paqësore në këtë luftë. gsh