Sekretari i Përgjithshëm i NATO-s, Mark Rutte, tha dje se sulmet ruse në Kiev mbrëmë, të cilat goditën zonat civile dhe misionin diplomatik të BE-së në Kiev dhe vranë të paktën 21 persona, tregojnë se Presidenti rus Vladimir Putin është gati të vazhdojë luftën.

“Jemi të gjithë të tronditur nga ajo që ndodhi, para së gjithash sepse këto janë sulme që nuk janë kundër objektivave ushtarake; këto janë objektiva civile.

Ndërsa po përpiqemi të bëjmë gjithçka për të mbështetur Presidentin e SHBA-së Donald Trump për t’i dhënë fund kësaj lufte, ndërkohë, Presidenti rus Putin është gati ta vazhdojë atë, të vazhdojë të sulmojë civilët e pafajshëm në Ukrainë”, tha ai në një konferencë për shtyp në qytetin gjerman të Würzburgut.

Ai vuri në dukje se ishte konsultuar me Presidenten e Komisionit Evropian Ursula von der Leyen dhe Përfaqësuesen e Lartë për Punët e Jashtme Kaia Kallas pas sulmit rus ndaj misionit të BE-së në Kiev, raportoi televizioni gjerman N-TV.

“Sulmi dëshmon edhe një herë se nuk duhet të jemi naivë në lidhje me Rusinë”, paralajmëroi Rutte. Megjithatë, ai tha se Rusia është e aftë për luftë hibride.

“Nëse e konsiderojnë të nevojshme, ata mund të kryejnë edhe një atentat”, theksoi Rutte. Sipas tij, Rusia po përpiqet gjithashtu të prishë trafikun ajror civil, për shembull në Gjermani dhe shtetet baltike. bw