Dy kongresmenë republikanë amerikanë, Andy Ogles dhe Marlin Stutzman, propozojnë presidentin e SHBA-së Donald Trump për Çmimin Nobel të Paqes 2025. Në letrën e tyre drejtuar sot Komitetit të Nobelit, ata e cilësojnë Trump si një udhëheqës që ka ulur konfliktet globale, ka ndërmjetësuar marrëveshje paqeje dhe ka hapur rrugë dialogu mes palëve në konflikt.

Nomimi thekson takimin e Trump me presidentin rus Vladimir Putin në Alaska dhe takimin me presidentin ukrainas Volodymyr Zelenskyy dhe liderët evropianë në Shtëpinë e Bardhë, ku ai premtoi mbështetje për sigurinë e Ukrainës dhe ndërmjetësim për një takim të ardhshëm mes Putinit dhe Zelenskyt.

“Me respekt paraqesim këtë nominim të Presidentit Donald J. Trump për Çmimin Nobel të Paqes, në vlerësim të kontributit të tij konkret për vëllazërinë ndërkombëtare, udhëheqjes së tij në uljen e konflikteve dhe rrezikut të luftës, si dhe përkushtimit për të nxitur dialogun si rrugë drejt pajtimit,” shkruajnë Ogles dhe Stutzman.

“Udhëheqja e tij vendimtare në arritjen e marrëveshjeve historike diplomatike, në uljen e konflikteve globale dhe në ndjekjen aktive të zgjidhjeve paqësore për disa nga mosmarrëveshjet më të vjetra të botës ka sjellë dhe vazhdon të sjellë një botë më paqësore.”

Në letrën e tyre drejtuar Komitetit të Nobelit, republikanët nënvizuan rolin e Trump në organizimin e samitit me Presidentin Vladimir Putin në Alaskë më 15 gusht 2025, të fokusuar në gjetjen e një rruge drejt armëpushimit në Ukrainë, shkëmbimit të të burgosurve, hapjes së korridoreve humanitare dhe marrëveshjeve të ardhshme të sigurisë – një hap i rëndësishëm drejt rihapjes së dialogut të drejtpërdrejtë e konstruktiv.”

Ata gjithashtu vlerësojnë takimin e zhvilluar më 18 gusht 2025 me Presidentin Volodymyr Zelenskyy dhe një numër liderësh evropianë për të diskutuar garancitë e sigurisë për Ukrainën dhe për të lehtësuar një dialog mes Zelenskyt dhe Putinit me synim paqen e qëndrueshme në rajon.

Përveç përpjekjeve për të zgjidhur konfliktin në Ukrainë, letra e Ogles dhe Stutzman e vlerëson Trump edhe për arritjen e një marrëveshjeje historike paqeje mes Armenisë dhe Azerbajxhanit, për angazhimin e tij direkt me liderët rajonalë për konfliktin në Gaza.

Duke e cilësuar Trump si “presidentin e paqes” kongresmeni Stutzman  shton:“Nuk është askush tjetër në botë që e meriton këtë vit Çmimin Nobel më shumë se ai, dhe këtë e kanë njohur tashmë disa liderë botërorë.”

Nëse i jap fund luftës Rusi-Ukrainë, mund të shkoj në parajsë

. Në një intervistë me Fox, ai deklaroi se fundi i luftës midis dy vendeve do ta ndihmonte atë të shkonte në parajsë.

“Dua t’i jap fund. E dini, nuk po humbasim jetë amerikane, nuk po humbasim ushtarë amerikanë. Po humbasim rusë dhe ukrainas, kryesisht ushtarë. Njerëz, pasi raketat godasin vendet e gabuara ose qytetet. Nëse mund të shpëtoj 7,000 njerëz në javë nga vrasja, mendoj se kjo është e mjaftueshme – dua të përpiqem të shkoj në parajsë, nëse është e mundurt”, tha Trump.

Shkarko dokumentin